विराटनगरमा एकैदिन ८ संक्रमितको ज्यान गयो

१८ कार्तिक, विराटनगर । कोरोना भाइरसको संक्रमणका कारण विराटनगरमा एकैदिन ८ जनाको ज्यान गएको छ । विराटनगरको विराट शिक्षण अस्पतालमा चार, नोबेलमा एक, न्युरो अस्पतालमा दुई र कोशी अस्पतालमा एक जना गरी एकैदिन ८ जनाको मृत्यु भएको हो ।

नोबेल शिक्षण अस्पतालमा विराटनगर महानगरपालिका–१५ की ५५ वर्षीया महिलाको मृत्यु भएको छ । म‌ंगलबार बिहान अस्पताल भर्ना भएकी उनको उपचारकै क्रममा मृत्यु भएको हो ।

यसैगरी मोरङको बूढीगंगा गाउँपालिकास्थित विराट शिक्षण अस्पतालको आइसोलेसनमा सुनसरीको इनरुवा नगरपालिका–१ की ४५ वर्षीया महिलाको मृत्यु भएको छ । यसैगरी विराट शिक्षण अस्पतालको आइसोलेसनमा सिराहा सुखीपुरका ७४ वर्षीय पुरुषको मृत्यु भएको हो । यसैगरी सुनसरीको इटहरी उपमहानगरपालिका–३ का ४८ वर्षीय पुरुषको पनि मृत्यु भएको छ ।

विराटमै उपचाररत धरान–१६ का ७६ वर्षीय वृद्ध पुरुषको पनि मंगलबार बिहान मृत्यु भएको छ । यसैगरी सुनसरीको धरान–१५ का ६३ वर्षीय पुरुषको मंगलबार बिहान ३ः३० बजेतिर न्यूरो अस्पतालमा मृत्यु भएको छ । उनी जनता समाजवादी पार्टीको लिम्बूवान राष्ट्रिय समितिका उपाध्यक्ष हुन् ।

यसैगरी न्यूरो अस्पतालमा उपचाररत विराटनगर महानगरपालिका–११ का ४९ वर्षीय पुरुषको मंगलबार बिहान मृत्यु भएको छ । यसैगरी विराटनगरको कोशी अस्पताल कोभिड–१९ उपचार केन्द्रमा उदयपुर घर भएका एक पुरुषको पनि मृत्यु भएको छ ।

उदयपुरको चौदण्डीगढी–६ का ४८ वर्षीय पुरुषको उपचारका क्रममा सोमबार राति १२ बजेतिर मृत्यु भएको हो । पछिल्लो समय विरगञ्जमा कोरोना नियन्त्रण हुन लागेका बेला विराटनगरमा भने संक्रमण र ज्यान जाने दर बढिरहेको छ ।