भारतीय सेनाध्यक्षलाई मानार्थ महारथीको सम्मान दिइदै

२० कात्तिक, काठमाडौं । नेपालको दुईदिने भ्रमणमा रहेका भारतीय सेनाध्यक्ष मनोज मुकुन्द नरवाणेलाई आज नेपाली सेनाको मानार्थ महारथीको सम्मान दिइदैछ । जंगीअड्डाको अभिलेखअनुसार भारतीय सेनाध्यक्ष नरवाणे नेपाली सेनाको मानार्थ महारथीको सम्मान पाउने १८ औं व्यक्ति हुनेछन् ।

भ्रमणको दोस्रो दिन आज शीतलनिवासमा राष्ट्रपति विद्यादेवी भण्डारीबाट नरवाणेले नेपाली सेनाको मानार्थ महारथीको सम्मान ग्रहण गर्दैछन् । नेपाली सेनाले उपलब्ध गराएको विवरणअनुसार सन् १९५० देखि एकअर्काको देशमा मानार्थ सेना प्रमुखको सम्मान दिने चलन रहीआएको छ ।

पछिल्लो समय नाकाबन्दीका बेला चिसिएको भारतसँगको सम्बन्ध अहिले भारतले मिचेको भूमिसहितको नक्सा जारी गर्दा पनि चिसिएको छ । यस्तो बेलामा नेपाल भ्रमण आएका नरवाणेलाई सम्मान दिन लागिएको हो । नेपालको नयाँ नक्सा जारी गर्दा विवादास्पद अभिव्यक्ति दिएका नरवाणेको भ्रमणको केहीले विरोध समेत गरिरहेका छन् ।