मनोज गजुरेलको अझै उस्तै माया लाग्छ : मीना ढकाल

२१ कार्तिक, काठमाडौं । कोरोना संक्रमण भएपछि हास्यकलाकार मनोज गजुरेल अस्पताल भर्ना भएका छन् । उनको फोक्सोमा समस्या रहेको बताइएको छ । आईसीयुमा उपचार गराईरहेका मनोजको धेरैले स्वास्थ्य लाभको कामना गरिरहेका छन् ।

ठीक यही बेला उनकी पूर्वपत्नी मीना ढकालले फेसबुकमा एक भावुक स्टाट्स शेयर गरेकी छिन् । दुई बर्षअघि छुट्टिएका उनीहरुबीच अझै पनि गहिरो प्रेम रहेको मीनाको स्टाट्सबाट देखिन्छ । दुई बर्षअघि मनोजबाट घरेलु हिंसाको शिकार भएको भन्दै मीनाले डिभोर्स मागेकी थिइन् ।

२० बर्ष सँगै बिताएका उनीहरुबाट २ छोराछोरी छन् । अहिले छोरा मनोजसँग र छोरी मीनासँग छन् । दुवै अलग बसिरहेका छन् । तर दुवैको एक अर्कासँग समय मिलाएर कुराकानी पनि गरिरहेका पाइन्छ । तर यसपटक मनोज बिरामी हुँदा मीना धेरै भावुक भएकी छिन् । उनले फेसबुकमा त्यो पीडा सबैमाझ शेयर गरेकी छिन् ।

जुन स्टाट्स पढ्ने अरु पनि भावुक बन्छन् ।

जिन्दगीले जुनसुकै मोड अख्तियार गरेको भएपनि तिमी कुनै समयको मेरो प्रेमी थियौ । मेरो आफ्नै जन्मदातालाई भन्दा बढी प्रेम तिमीलाई गरेरै तिमीसंग एकाकार भएकी थिएँ । हामी एक भएका थियौँ र म परम्परा अनुसार तिम्रो सिंदुरको ऋणी भएकी थिएँ ।

तिम्रो सेवालाई मेरो परम धर्म ठानेर तिमी संग मैले जिवनका विसौँ बर्ष पार गरेकी छु । तिम्रो र मेरो आत्मियताका साक्षी दुई प्राण छोरा र छोरी जन्माएकी छु। केही अपवादलाई बाहिर राखेर र मेरा केही खुशीहरुको गला रेटेरै पनि मैले तिमीलाई मेरो सिंगो जिन्दगी अर्पण गरेकी थिएँ ।

भलै समयले तिम्रो र मेरो बिचमा दुरी ल्यायो होला फेरीपनि मेरा दुई सन्तानको जन्मदाताको रुपमा आजपनि म तिमीलाई उत्तीकै सम्मान गर्छु र माया गर्छु। आज तिमी आईसियु मा उपचारारत छौ भन्ने समाचारले मलाई वि़क्षिप्त बनायो । जतिसुकै मनमुटाव भएको भएपनि तिमी सिकिस्त भएको म सहन नसक्ने नै रहेछु आज महसुस भईरहेछ।

म तिम्रो सुस्वास्थ्यको लागि भगवान संग प्रार्थना गर्दछु । तिम्रो जिवन संग मेरा दुइ सन्तान पनि जोडिएका छन। तिमी ठिक छौ र त उनीहरु ढुक्क छन, सुरक्षित छन । छुट्टै भएपनि टाढै भएपनि तिम्रो सलामतीले मात्रै मेरा सन्तान सलामत छन(म यो रियलाईज गरिरहेछु ।
मेरो प्रार्थना सुन्छन भगवानले, तिमी छिटै अस्पतालबाट डिस्चार्ज हुनेछौ र बाबुनानीको सामिप्यतामा पुग्नेछौ भन्ने आशामा छु । मनोज गजुरेल, तिमी छिटै हार मान्ने मान्छे होईनौ—मैले बिसौँ तिजका निराहार व्रत बसेकी छु तिम्रो लागि । आज पनि तिम्रो दिर्घायुको कामना गर्न छोडेकी छैन । छोराछोरी तिम्रो प्रति़क्षामा छन।।। तिमी र म विच जस्तासुकै ब्यबहारीक बेमेल भएपनि तिम्रो जिवन मेरोलागि महत्वपुर्ण छ(हार नमानिदेउ । छिटै रिकभर भएर घर पुगेको देख्न पाउँ !

(उही तिमीलाई आयुश्मान भएको देख्न चाहने तिम्री पूर्व अर्धाङ्गीनी )