दिल्ली हाइकोर्टले माग्यो सलमान अमिरलगायतको रिटमा २ टिभीसँग लिखित जवाफ

२४ कार्तिक, नयाँदिल्ली । फिल्म क्षेत्रका सदस्यमाथि मिडिया ट्रायल गरेको आरोपमा मुद्दा परेपछि दिल्ली हाइकोर्टले टाइम्स नाउ र रिपब्लिक टिभीसँग लिखित जवाफ माग गरेको छ।

बलिउड फिल्म निर्माता र अभिनेताहरूले दायर गरेको निवेदनमाथि सुनुवाइ गर्दै सोमबार दिल्ली हाइकोर्टले रिपब्लिक टिभी र टाइम्स नाउसँग लिखित जवाफ पेस गर्न आदेश गरेको हो।

अभिनेताहरू शाहरुख खान, अमिर खान, सलमान खान र करण जोहरलगायतले यी दुई टिभीले मिडिया ट्रायल गरेको भन्दै हाइकोर्टमा रिट निवेदन दायर गरेका थिए। उनीहरुले बलिउडका कलाकारमाथि अपमानजनक र साम्प्रदायिक टिप्पणी गरेको आरोप लगाउँदै अदालत पुगेका थिए।

रिपब्लिक र टाइम्स नाउ टिभीले मीडिया ट्रायल गरेकोले यो कार्य आगामी दिनमा रोक्न र यस्तो गर्नेलाई कारबाही गर्न उनीहरुको निवेदनमा माग गरिएको थियो।

न्यायाधीश राजीव शकधरको इजलासले मिडिया कम्पनीहरुलाई कसैको पनि मानहानी हुने सामग्री प्रकाशन र प्रशारण गर्ने छुट नभएकाले मिडिया ट्रायलका विषयमा लिखित जवाफ दिन र आगामी दिनमा त्यस्तो कार्य नगर्ने सुनिश्चितताबारे जवाफ दिन भनेको छ। यस्ता सामग्री सामाजिक सञ्जालमा अपलोड नहुने कुराको ग्यारेन्टी गर्नसमेत अदालतले भनेको छ।