सचिवालय बैठक बालुवाटारमा जारी, केहीबेर पछि नै मन्त्रीपरिषद् बैठक बस्ने

३ मंसिर, काठमाडौं । प्रधानमन्त्रीसमेत रहेका पार्टी अध्यक्ष केपी ओलीसहितको सहभागितामा सत्तारुढ नेपाल कम्युनिष्ट पार्टी (नेकपा) को सचिवालय बैठक बालुवाटारमा चलिरहेको छ । ओलीको लाख चाहना विपरित अहिले उनकै सरकारी निवासमा सचिवालय बैठक जारी छ । आफूसमेत उपस्थित सो बैठकले आजै कुनै अप्रिय निर्णय नलिने विश्वासका साथ ओली सहभागी रहेको उनकै सचिवालयले पुष्टी गरेको छ ।

प्रधानमन्त्रीका प्रेस सल्लाहकार सूर्य थापाले यसको पुष्टी गरेका छन् । थापाका अनुसार आजको सचिवालय बैठक लामो बस्दैन । किनभने २ बजेका लागि मन्त्रिपरिषद बैठक बोलाइएकाले प्रधानमन्त्री ओली बस्न नमिल्ने अवस्थाबारे पनि उनले खुलाए । तर आजको बैठकमा गत शुक्रबार अर्का अध्यक्ष पुष्पकमल दाहाल प्रचण्डद्वारा प्रस्तुत एकल प्रतिवेदनमाथि छलफल गर्ने पक्षमा सचिवालय सदस्यहरु रहेका छन् ।

राष्ट्रपति विद्यादेवी भण्डारीलगायत नेकपाका दोस्रो तहका नेताहरु भने आजको बैठक लामो नगरी केही समय कुलिङ पिरियड बनाएर दुबै अध्यक्षबीच सहमति कायम गर्न लागिपरेका छन् । यसको कसरत राष्ट्रपतिले मात्र नभई पार्टी भित्रकै केही नेता र शक्ति केन्द्रलेसमेत गरिरहेका छन् ।

हिजै मात्र नेपालका लागि चिनियाँ राजदूत होउ यान्छीले यसको पहल गरेकी छन् । उनले नेकपा भित्रको विवाद मिलाउन प्रधानमन्त्री ओली र राष्ट्रपति भण्डारीसँग गोप्य भेटघाट गरेकी छन् । यस्तै आजपनि राष्ट्रपति भण्डारीले ओली र प्रचण्डलाई बालुवाटार बोलाएर छलफल गर्न चाहेकी थिइन् । ओली शीतल निवास गएपनि प्रचण्ड भने नपुगेको स्रोतले बतायो । यद्यपि राष्ट्रपति भण्डारीबाट अध्यक्ष प्रचण्डलाई समेत बोलावट भएको स्रोतको दाबी छ ।

आजको निर्धारित कार्यक्रम अनुसार बैठकको प्रारम्भका प्रचण्डले बोल्ने र त्यसको जवाफ ओलीले दिने रहेको छ । तर आजै सबै विषयमा छलफल नगरी अर्काे मिति मात्र तोक्ने तयारी भइरहेको बुझिएको छ । कार्यकारी अध्यक्ष पुष्पकमल दाहाल प्रचण्ड बैठकका लागि १५ मिनेट अगाडि नै बालुवाटार पुगेका थिए भने अन्य नेताहरु पनि तोकिएको समय १ बजे नै बालुवाटार पुगिसकेका थिए ।

गत शुक्रबारको बैठकमा पेश अध्यक्ष प्रचण्डको राजनीतिक प्रस्तावको जवाफ अध्यक्ष एवम् प्रधानमन्त्री केपी शर्मा ओलीले दिने तर त्यसका लागि केही समय ओलीले माग्ने स्रोतले बताएको छ । ओलीले आजको सचिवालय बैठक सार्न हरसम्भव प्रयास गरेता पनि अन्त्यमा उनी असफल भए ।

ओलीले प्रचण्डले राखेको राजनीतिक प्रतिवेदनको जवाफ नदिने मौखिक जानकारी गराएका थिए तर, विभिन्न छलफल र भेटवार्तापछि ओली अन्त्यमा छलफलमा बस्न तयार भएका छन् ।