उद्योग वाणिज्य महासंघकी अध्यक्ष भवानी राणाविरुद्ध उजुरी

४ मंसिर, काठमाडौं । नेपाल उद्योग वाणिज्य महासंघकी अध्यक्ष भवानी राणाको पदको वैधानिकता माथि नै प्रश्न उठाउदै उजुरी परेको छ । जिल्ला प्रशासन कार्यालय काठमाडौंमा राणा नेतृत्वको कार्यसमितिमाथि वैधानिकताकाे प्रश्न उठाउँदै उजुरी परेको हो ।

राणा नेतृत्वको समितिको पदावधि २८ चैत २०७६ मै सकिएको थियो । तर लकडाउनका कारण चुनाव हुन नसक्ने अवस्था आएपछि उनको कार्यकाल लम्बिएको छ । वैधानिक व्यवस्था अनुसार राणा अवैधानिक अध्यक्ष रहेको दावी उजुरीमा गरिएको छ । यसलाई चुनाव टार्ने रणनीतिविरुद्धको कदमका रुपमा लिइएको छ । यसअघि पटकपटक चुनावको मिति तय गरिएपनि विशेष कारण देखाउँदै स्थगित हुँदै आएको थियो ।

महासंघका प्रदेश २ का अध्यक्ष शिवशंकर शाह हिराले दिएको उजुरीमा पदावधि सकिएपछिको कार्यसमितिले गरेको निर्णय मान्य नहुने भन्दै मंसिर ११, १२ र १३ गते काठमाडौंमा हुने साधारणसभा तथा निर्वाचन रोक्न समेत माग गरिएको छ ।

चैत २८ गते पदावधि सकिएसँगै राणा नेतृत्वको कार्यसमिति स्वतः पदमुक्त भइसकेको भन्दै नयाँ तदर्थ समिति गठन गरेर निर्वाचन गर्नुपर्ने प्रदेश अध्यक्ष शाहले दावी गरेका छन् ।

राष्ट्रिय निर्देशन ऐन, २०१८ अनुसार दर्ता भएका कारण अवैधानिक तरिकाले महासंघ अघि बढे सरकारले हस्तक्षेप गर्नुपर्ने उजुरीमा उल्लेख गरिएको छ ।