सरकारको विवेक गुमेको भन्दै राप्रपाले निकाल्यो विज्ञप्ति

८ मंसिर, काठमाडौं । राष्ट्रिय प्रजानन्त्र पार्टीले संखधर शाख्वा र रत्नपार्कको नाम परिवर्तन गर्ने कुरा सरकारको विवेकहिन निर्णय भएको बताएको छ । राप्रपाले एक विज्ञप्ति जारी गर्दै मौलिक संस्कृति र सभ्यताको धरोहर व्यक्तित्व र राष्ट्रिय विभुति संखधर भएको उल्लेख गरेको छ । समस्त नेपालीका आदरणीय संखधरलाई राष्ट्रल सम्मान गुर्नपर्ने राप्रपाको माग छ ।

संखधरको नामबाट देशका विभिन्न संस्था, योजना, संरचना र उपलब्धीको नामाकरण हुनु स्वाभाविक भएको राप्रपाको ठहर छ । तर यस क्रममा दशकौंदेखि नामाकरण भएर आएका संरचनाको नाम आज अचानक बदल्नु उचित नभएको पार्टीले आज बताएको छ ।

विज्ञप्तिमा भनिएको छ ः हामी नेपाल राष्ट्र निर्माण र नेपालको राष्ट्रिय एकता र राष्ट्रियताको संरक्षणमा वडा महाराजा पृथ्वीनारायण शाह, राजा महेन्द्र र वीपी कोइराला अग्रस्थानमा रहेको ठान्दछौं । उनै राजा महेन्द्रको रानी मुमा वडामहारानीको नाममा झण्डै आधा शताब्दीदेखि नामाकरण गरिएको रत्नपार्कको नाम बदल्नु दुई कारणले अनुचित ठान्दछौं । पहिलो यो कार्यले मुमा बडामहारानी रत्नप्रति अन्याय भएको छ । दोश्रो, यो नामाकरणले नेपालको मौलिक संस्कृतिका एक धरोहरको अवमुल्यन गरेको छ ।

संखधर शाख्वाको योगदानको सम्मान गर्न हाल भईरहेको संरचनाको नाम परिवर्तन गरेर होइन, संखधरको नाम राखेर नयाँ र भब्य संरचना बनाउनु पर्छ भन्ने हाम्रो मान्यता हो । त्यसकारण हाल महानगरपालिकाले रत्नपार्कको नाम बदल्ने निर्णय अविवेकी र गलत छ । हाम्रो माग छ : संखधरको नामबाट अझ भब्य साँस्कृतिक/ऐतिहासिक संरचना बनाइयोस त्यस बखत मात्र उनिप्रति हामीले सहि रुपमा सम्मान गरेको ठहरिनेछ । काठमाडौं महानगरपालिकाको वर्तमान अविवेकी निर्णय तुरुन्त फिर्ता गर्न राप्रपाका तीन अध्यक्ष पशुपती शमसेर ज.ब.रा., डा.प्रकाशचन्द्र लोहनी र कमल थापाले संयुक्त वक्तव्य जारी गरेका छन् ।