ताप्लेजुङबाट अचानक किन फर्किए ओली

८ मंसिर, काठमाडौं । ताप्लेजुङबाट अचानक प्रधानमन्त्री केपी शर्मा ओली काठमाडौं फर्किएका छन् । इलामको सन्दकपुर गाउँपालिकाको जौबारीमा स्थापित प्रहरी बलको बोर्डर आउट पोस्ट बीओपी निरीक्षणका लागि प्रधानमन्त्री ओली इलाम जाने कार्यक्रम भएपनि ताप्लेजुङबाटै फर्किएका हुन् ।

मौसममा खराबी आएपछि प्रधानमन्त्री ओली चढेको हेलिकप्टर इलाममा ल्याण्ड हुन नसकेपछि कार्यक्रम समेत रद्द गरिएको छ । कार्यक्रम रद्द भएसँगै नेपाल–भारत सीमा क्षेत्रमा पर्ने जौबारीमा भेला भएका कार्यकर्ता, स्थानीय, जनप्रतिनिधिलगायतका सहभागी निराश भएर फर्किएका छन् । प्रधानमन्त्रीको सुरक्षार्थ चार वटा सुरक्षा निकायका टोली कार्यक्रमस्थलमा परिचालित गरिएको थियो ।

कार्यक्रमका लागि स्थानीय जनप्रतिनिधि, विभिन्न कार्यालय प्रमुख, पत्रकार, स्थानीय गरी पाँच सयभन्दा बढीको सहभागिता रहेको गाउँपालिकाले जनाएको छ ।

नेपाल–भारतको सीमा क्षेत्र निरीक्षणका लागि माईजोगमाई र सन्दकपुर गाउँपालिकाको सिमानामा पर्ने जौबारीमा प्रधानमन्त्री ओली दिउँसो एक बजे आउने समय तय भएको थियो ।