साल्ट ट्रेडिङको प्रतिफल ढिला आयो तर कडा आयो, आ. व. २०७६/७७ को कति ?

८ मंसिर, काठमाडौं । साल्ट ट्रेडिङ्ग कर्पोरेशन लिमिटेडले गत आर्थिक वर्षको नाफाबाट प्रतिफल प्रस्ताव गरेको छ । कम्पनी सञ्चालक समितिको बैठकले आर्थिक वर्ष २०७५/७६ को नाफाबाट २५ प्रतिशत बोनस तथा १० प्रतिशत नगद लाभांश गरी कूल ३५ प्रतिशत लाभांश प्रस्ताव गरेको हो ।

नेप्सेमा सुचीकृत धेरै कम्पनीहरुले गत आर्थिक वर्ष २०७६/७७ को लाभांश प्रस्ताव गरी कतिपयले साधारण सभा सम्पन्न गरिसकेका छन् भने अधिकांश कम्पनीहरुले सधारणसभाको तयारी रहेका छन् । तर सरकारी स्वामित्व रहेको साल्ट ट्रेडिङ्गले एक वर्षअघिको प्रतिफल ढिला गरी प्रस्ताव गरेको हाे ।

लिमिटेडले आ.व. २०७२/७३ बाट २० प्रतिशत बोनस र ५ प्रतिशत नगद लाभांश बाँडेको थियो । त्यसपछि आर्थिक वर्ष २०७३/७४ र २०७४/७५ को नाफाबाट कम्पनीले समान २५ प्रतिशत बोनस तथा १० प्रतिशत नगद गरी कूल ३५ प्रतिशत प्रतिफल प्रस्ताव गरेको लिमिटेडले आर्थिक वर्ष २०७५/७६ पनि सोही लयमा प्रतिफल प्रस्ताव गरेको हाे ।

प्रस्तावित बोनस कर्पोरेशनको ५३ औं वार्षिक साधारण सभाबाट अनुमोदन भएपश्चात मात्र शेयरधनीलाई वितरण हुनेछ । लाभांश वितरणपछि कम्पनीको चुक्ता पूँजी १९ करोड १९ लाख ६९ हजार ७५० रुपैयाँ पुग्नेछ । आ. व. २०७६/७७ को कति नाफाबाट भने कति लाभांश प्रस्ताव हुने हो, त्यो भने पर्ख र हेरकै अवस्थामा रहेको छ ।