डीएसपी एकाएक सम्पर्कविहीन, प्रहरीमा मच्चियो हलचल

१२ मंसिर, कैलाली । कैलालीको इलाका प्रहरी कार्यालय मालाखेतीका इन्चार्ज प्रहरी नायब उपरीक्षक(डीएसपी) भरतबहादुर चौधरी बुधबार राति एकाएक सम्पर्कविहीन भएपछि कैलाली प्रहरीमा हलचल मच्चियो ।

९ बजेसम्म सम्पर्कमै रहेका डीएसपी चौधरी सम्पर्कविहीन भएपछि राति नै उनको खोजीका लागि ठूलो संख्यामा प्रहरी परिचालन गरियो ।कैलालीका प्रवक्ता प्रहरी नायब उपरीक्षक प्रतीक विष्टको नेतृत्वमा चौधरीको खोजीका लागि राति नै टोली खटाइयो।  प्रदेश प्रहरी कार्यालयबाट समेत छुट्टाछुट्टै टोली परिचालन गरिएको थियो ।

मालाखेतीमा नयाँ इञ्चार्ज पठाइयो

इलाका प्रहरी कार्यालय, मालाखेतीका इञ्चार्ज सम्पर्कबिहीन भएको प्रकरणपछि उनको ठाउँमा नयाँ प्रहरी नायब उपरीक्षक ‘डीएसपी’पठाइएको छ । प्रहरी प्रधान कार्यालय, नक्सालले डीएसपी प्रेमबहादुर शाहीलाई त्यहाँ काज सरुवा गरेको हो ।

उनी लागूऔषध नियन्त्रण ब्युरो, बबरममहलमा कार्यरत थिए । मालाखेतीका डीएसपी चौधरी मंगलबार राति ९ बजेपछि सम्पर्कविहीन भएका थिए । प्रहरीका अनुसार  डिएसपी चौधरी होटलमा एक केटीको साथमा फेला परेका थिए । मंगलबार राति गोदावरी नगरपालिकाकाे होटलमा केटी लिएर गएपछि चौधरीले फोन अफ गरेका थिए । प्रहरीले खोजी  गर्दै जाँदा उनी होटलमा भेटिएका हुन् । अहिले यस प्रकरणमा प्रदेश प्रहरी कार्यालयले छानविन गरिरहेको छ ।

चौधरीमाथि छानविनका लागि सुदूरपश्चिम प्रदेश प्रहरी कार्यालयले प्रहरी उपरीक्षक (एसपी) दीलिपसिंह देउवाको नेतृत्वमा छानविन समिति बनाएको छ । समितिले प्रारम्भिक छानविनमा चौधरीले जिम्मेवारीमा रहँदा लापरबाही गरेको निष्कर्ष निकालेको छ । मालाखेतीमा डीएसपी चौधरीको सरुवा भएको दुई महिना मात्र पुगेको थियो ।