महासंघको निर्वाचन तयारी पुरा, प्रधान समुह ७५ प्रतिशत मतसहित विजयी हुनेमा ढुक्क

१२ मंसिर, काठमाडौं । नेपाल उद्योग वाणिज्य महासंघको जारी निर्वाचनको अन्तिम दिन शनिवार नयाँ नेतृत्वका लागी मतदान हुँदैछ ।महासंघको ५४ औं साधारण सभाबाट नयाँ नेतृत्व चयन गर्नका लागि शनिवार मतदान हुन लागेको हो ।

जिल्लानगरबाटै प्रतिनिधित्व गर्ने बिराटनगरका ब्यवसायी किशोरकुमार प्रधान र एसोसियटस्बाट प्रतिनिधित्व गर्ने चन्द्र ढकालबीच वरिष्ठ उपाध्यक्षमा राेचक प्रतिस्पर्धा हुँदैछ । सुरुवातबाटै निकै प्रतिस्पर्धा हुने देखिएको वरिष्ठ उपाध्यक्ष पदमा मतदान हुनु भन्दा १२ घण्टा अगाडी नै ५० प्रतिशत मतभार रहेको जिल्लानगरबाट आफुले पाउने मतको आंकलन दुवै पक्षले गरिसकेका छन् ।

नयाँ बानेश्वरको एभरेष्ट होटेलमा १३ गतेबाट अध्यक्ष बन्ने भावी अध्यक्ष शेखर गोल्छा र वरिष्ठ उपाध्यक्षका उम्मेदवार किशोर प्रधानसहितका पुर्व अध्यक्षहरु र जिल्लानगरका अध्यक्षहरुको बैठकले प्रदेश १ बाट ८० प्रतिशत मत, प्रदेश २ बाट सतप्रतिशत, बागमती प्रदेशबाट ७० प्रतिशत, गण्डकी प्रदेशबाट ५० प्रतिशत, लुम्विनी प्रदेशबाट ७० प्रतिशत, कणार्ली र सुदुर प्रदेशबाट ९० प्रतिशत जिल्लानगरको मत आफुले प्राप्त गर्ने ७ वटै प्रदेशका जिल्लानगरका अध्यक्षसहितको बैठकले निष्कर्ष निकालेको दावी गरेका छन् ।

वस्तुगत र एसोसियटबाट ६५ प्रतिशत आफुले मत पाउदा समग्रमा ७५ प्रतिशतको हारहारीमा मत पाउदाँ सिङ्गो टीम नै निर्वाचित हुनेमा उनीहरू ढुक्क देखिन्छन् ।

पछिल्लो समय चन्द्र ढकाल समुहले निकै भरोसा गरेको गण्डकी प्रदेश, लुम्विनी प्रदेश, कणार्ली र सुदुर पश्चिम प्रदेशका जिल्ला अध्यक्षहरु शेखर गोल्छा र किशोर प्रधानको समुहमा खुलेरै लागेका छन् । महासंघको वरिष्ठ उपाध्यक्षमा दुवै उम्मेद्वार उक्तिकै बलियो रहेपनि अनुभव, अभ्यास र महासंघमा योगदानका आधारमा किशोरकुमार प्रधानलाई नेतृत्व दिनुपर्नेमा अधिकांश जिल्लानगर अध्यक्षहरु एकमत रहेकाे प्रधान पक्षले दावी गरेकाे छ ।

महासंघमा आवद्ध सदस्यहरुको हित र सरकारसँग आफ्नो कुरा प्रष्ट राख्न सक्ने प्रधानलाई नेतृत्वमा ल्याउँदा व्यवसायीहरुको हितमा काम गर्न सजिलो हुने उनीहरुको भनाई छ । वर्तमान अध्यक्ष भवानी राणा, भावी अध्यक्ष शेखर गोल्छा, निर्वतनमान अध्यक्ष पशुपति मुरारकालगायतका अधिकांश पुर्व अध्यक्षहरु पनि यसपाली किशोर प्रधानलाई मत दिनुपर्ने भन्दै हिडेका छन् । पछिल्लो समिकरण हेर्दा किशोर प्रधान र उनको समुह निकै बलियो देखिएको छ भने चन्द्र ढकाल समुह रक्षात्मक अवस्थामा पुगेकाे ठहर प्रधान पक्षकाे छ ।

बिहिवारकाे बन्दसत्रमा चन्द्र ढकालले आफनो समुहले हार्ने लक्षण देखेपछि शेखर गोल्छाको नेतृत्व क्षमता र १० बर्षे योजना माथी कडा टिप्पणी गरेकाे आराेप प्रधान पक्षले लगाएकाे छ । किशोर प्रधानले पुर्व अध्यक्षको सम्मान, अध्यक्ष शेखर गोल्छाको भिजन कार्यान्वयन गर्न सारथी बन्ने र गोल्छापछि आफु अध्यक्षमा आएपछि गोल्छाले सुरु गरेका कार्यक्रमसगैं अन्य भिजन पनि प्रस्तुत गर्ने बन्दसत्रमा बताएका छन् ।

जिल्लानगर उपाध्यक्षमा दिनेश श्रेष्ष्ठ, वस्तुगतमा अञ्जन श्रेष्ठ, एसोसियटमा सौरभ ज्योतिसहित जिल्लानगर, वस्तुगत र एसोसियटबाट उम्मेदवार भएका सबै उम्मेदवारले फराकिलो मतअन्तरले बिजयी हुनेमा गोल्छा समुह ढुक्क रहेको छ । मतदान शनिवार विहान ८ बजेबाट सुरु हुने छ । निर्वाचन समितिले पनि तयारी पुरा भएको जानकारी दिएको छ ।