केराउ तस्करीका लागि गणपतिलाई १० लाख ?

१६ मंसिर, बीरगञ्ज । पर्सा जिल्लाका ग्रामीण भेगमा पर्ने पकाहा र सबैठवा नाका हुँदै ट्याकटरकै माध्यमले केराउ तस्करी भइरहेपनि त्यसलाई नियन्त्रण गर्ने दायित्व बोकेको माथिल्लो निकाय भने मौनधारण गरेर बसेको छ । नेपाल प्रहरी र सशस्त्र प्रहरीको सेटिङ्ग मिले पश्चात् पकहा र सबैठवा नाका हुँदै दिनहुँ करोडौं बराबरको केराउ भारततर्फ निर्यात हुँदै आएको हो ।

पकहा र सबैठवा नाका हुँदै कुख्यात तस्कर प्रमोद सहनी र भगत भनिने तस्कर समुहले ट्रयाक्टरकै माध्यमले तस्करीका मालसमान आयात निर्यात गर्ने गरेको स्थानीयले बताएका छन् ।

स्थानीय प्रहरी चौकी र बोर्डर आउट पोस्ट पकहाका सशस्त्र प्रहरी निरीक्षक अमृत केसी तथा बोर्डर आउट पोस्ट सबैठवाका सशस्त्र प्रहरी निरीक्षक प्रकाश भुजेललाई मासिक लाखौ रूपैयाँ नजराना दिए पश्चात् ट्याक्टरकै माध्यमले तस्करीको लाइन सुचारू भएको स्थानीयले दावी गरेका छन् ।

सीमा नाकाको बोर्डर आउट पोस्टका इन्चार्जको मिलेमतोमा मात्र तस्करीको लाइन कहाँ चलाउन सक्छन् भन्दै सशस्त्र प्रहरी श्रोतले सशस्त्र प्रहरी बल नेपाल १३ नम्बर गण बीरगञ्जका प्रमुख सशस्त्र प्रहरी उपरीक्षक राजेन्द्र खडकाले मासिक १० लाख नजराना बुझे पश्चात् केराउ तस्करीको कार्य सुचारू भएको बताए ।

श्रोतका अनुसार तस्कर समुहका मुख्य नाइके प्रमोद सहनी र भगत भनिनेले स्थानीय बीओपी पकहा र सबैठवाकै माध्यमले सशस्त्र प्रहरी उपरीक्षक राजेन्द्र खडकाको निम्ति मासिक १० लाख बुझाउने गरेको बताए । हाल दुवै बीओपी इन्सपेक्टर बिदामा बसेका छन् ।

सशस्त्र प्रहरी बल संगठन एउटा असल र इमान्दार संगठनको रूपमा मानिने गरेपनि सशस्त्र प्रहरी बल नेपालकै केही भ्रष्ट प्रहरीले गर्दा सम्पूर्ण सशस्त्र प्रहरी बल नेपालको बदनाम हुँदै गएको प्रष्ट हुन्छ । तसर्थ सशस्त्र प्रहरी बल नेपाल १३ नम्बर गणका गणपतिको साथ साथै बोर्डर आउट पोस्ट पकहा र सबैठवाका सशस्त्र प्रहरी निरीक्षकले गरेको कार्यप्रति संगठन प्रमुख आईजीपी शैलेन्द्र खनालको विशेष ध्यान जान अति आवश्यक देखिएको छ ।