डीआईजी पोखरेल एआईजीमा बढुवा

२५ मंसिर, काठमाडौं । नेपाल प्रहरीका डीआईजी विश्वराज पोखरेललाई एआईजीमा बढुवा भएका छन् । सरकारको आज बसेको मन्त्रिपरिषद बैठकले पोखरेललाई एआईजीमा बढुवा गरेको हो ।

संसदको राज्य व्यवस्था समितिले हिजो मात्रै व्यक्ति विशेषका लागि दरबन्दी थप्न नहुने भन्दै बढुवा नगर्न सरकारलाई निर्देशन दिएको थियो। तर, सरकारले सो निर्देशन बेवास्ता गर्दै पोखरेललाई बढुवा गर्ने निर्णय गरेको हाे ।

सरकारको सो निर्णयसँगै इन्सपेक्टरमा वैकल्पिक सूचीका पोखरेल भावी प्रहरी महानिरीक्षक हुने अब भने पक्का भएकाे छ । उनी ०४९ चैतमा इन्स्पेक्टरबाट प्रहरी सेवामा प्रवेश गरेका थिए । प्रहरी नायव उपरिक्षक हुँदा उनको व्याच (१०१ टोली) मा विश्वराज १८ औं वरियतामा थिए ।

प्रहरी उपरीक्षक बढुवा हुँदा पाँचौ बरियतामा रहेका पोखरेलले प्रहरी वरिष्ठ उपरिक्षक (एसएसपी) हुँदा फड्को हानेर एक नम्बरमा बढुवा भए ।तत्कालीन डीआईजी शुशील भण्डारीको सवारी दुर्घटनामा निधन भएपछि पोखरेलले अर्को फड्को हाने । आफूभन्दा सिनियर एसएसपीलाई उछिन्दै उनी एकल नायव महानिरीक्षक (डिआईजी) मा बढुवा भएका थिए ।