माछा मार्ने क्रममा विवाद हुँदा एक जनाको मृत्यु, चार घाइते

२९ मंसिर, राजविराज । सप्तरीमा माछा मार्ने क्रममा भएको विवाद बढेर झडप हुँदा आइतबार राति एक महिलाको मृत्यु भएको छ । बोदे बर्साइन नगरपालिका–३ की ४५ वर्षीया गंगियादेवी मण्डलको मृत्यु भएको हो ।

झडपमा चार जना घाइते भएकोमा एक जनाको अवस्था गम्भीर रहेको प्रहरीले जनाएकाे छ । प्रहरीका अनुसार सार्वजनिक पोखरीमा माछा मार्ने विषयमा आइतबार दिउँसो स्थानीयबीच विवाद भएको थियो । विवाद बढ्दै जाँदा राति १० बजे झडप भएको हो ।

दुवै पक्ष बन्चरो, भाटालगायत सामग्री बोकेर झडपमा उत्रिएका थिए । घटनामा संलग्न भएको आरोपमा प्रहरीले चार जनालाई नियन्त्रणमा लिएको र थप अनुसन्धान भइरहेको जनाएकाे छ ।