चार करोडको लागतमा वडा कार्यालय भवन निर्माण सम्पन्न

३० मंसिर, गण्डकी । कास्कीको मादी गाउँपालिकामा सात वटा वडा कार्यालय भवन निर्माण भएको छ । जिल्ला समन्वय समिति कास्कीको ६० प्रतिशत र गाउँपालिकाको ४० प्रतिशतका आधारमा कूल रु चार करोड ३४ लाखको लागतमा सात वटा सुविधा सम्पन्न वडा कार्यालय भवन निर्माण गरिएको हो ।

वडा नं. ४, ५ र १२ को कार्यालय भवनको निर्माण सम्पन्न भई सञ्चालनमा आएको छ भने ६, ७, ८ र ९ को वडा कार्यालय भवनको निर्माण कार्य अन्तिम चरणमा पुगेका छन् । जिल्ला समन्वय समिति कास्कीका प्रमुख बैनबहादुर अधिकारी क्षेत्रीले वडा नं। ५ स्थित तितेपानी देउरालीमा निर्माण भएको आधुनिक वडा कार्यालय भवनको आज एक समारोहबीच उद्घाटन गर्दै विकास निर्माणमा स्थानीय बासिन्दाको सक्रियताको खाँचो औँल्याए ।

नवनिर्मित भवनबाट कार्यसम्पादनमा सहयोग पुग्नुका साथै जनताका काम छिटो र छरितो हुने गाउँपालिकाका अध्यक्ष बेदबहादुर गुरुङले जानकारी दिए । आवश्यकता अनुसार बाँकी वडा कार्यालय भवन समेत निर्माण गरिने उनको भनाइ छ ।

नेपाल कम्युनिष्ट पार्टी९नेकपा०का एकबहादुर कार्की, नेपाली कांग्रेसका भानु ढकाल, वडाध्यक्ष सत्यराज सापकोटा, जग्गादाता रुद्र अधिकारी लगायतले सुविधान सम्पन्न भवन निर्माणसंगै सेवाग्राहीलाई सुविधा पुग्ने विश्वास व्यक्त गरे ।