चिनी मिल सञ्चालकलाई पक्राउ पुर्जी जारी

२ पुष, जनकपुर । उखु किसानको करोडौ रकम खाएर ठगी गर्ने चिनी मिल सञ्चालकलाई प्रहरीले पक्राउ गर्न शुरु गरेको छ । जिल्ला प्रशासन कार्यालय सर्लाहीले धनकौलस्थित अन्नपूर्ण चिनी उद्योगका सञ्चालक राकेश अग्रवालविरुद्ध पक्राउ पूर्जी जारी गरेर पक्राउ गर्ने क्रम शुरु गरेको हो ।

किसानले दिएको उजुरीको आधारमा उनीविरुद्व पक्राउ पूर्जी जारी गरिएको हो । यो चिनी उद्योगले उखु किसानको झण्डै १७ करोड रुपैयाँ बक्यौता दिन बाँकी छ ।

‘अग्रवालको मूल घर काठमाडौं भएकाले उनको खोजी चलिरहेको छ । अन्नपूर्ण चिनी उद्योगले सर्लाहीको बरहथवा, धनकौल, बलरा, रामनगर, बसबरियासहितका ठाउँका हजारौं किसानको पाँच वर्ष यता उखुको भुक्तानी नै गरेको छैन । भुक्तानी नपाएपछि अहिले यहाँका किसान काठमाडौं गएर आन्दोलन थालेका छन् ।

सरकारले वार्ताको प्रयास थालेपनि किसानले बक्यौता नदिई वार्तामा नबस्ने अडान लिएपछि उद्योग मन्त्रालयले प्रहरीलाई पक्राउ पूर्जी जारी गर्न लगाएको हो ।