‘हल अफ फेम’ सिजन २ पुस ११ गतेदेखि शुरु हुँदै

३ पुष, काठमाडौं । प्रवासमा रहेर पनि गायन प्रतिभालाई प्रोत्साहन गर्ने कार्यक्रम ‘हल अफ फेम’को सिजन २ पुस ११ गतेबाट शुरु हुने भएको छ । एमएनटीभी अष्ट्रेलियाको आयोजनामा हुन लागेको यो रियालिटी शोको प्रशारण  नेपालमा हिमालय टेलिभिजनबाट पनि हुनेछ ।

विभिन्न देशमा रहेर गायन प्रतिभालाई उजागर गर्न चाहनेहरु बीचबाट छनौट भएका ५० जनाको बीचमा प्रतिष्पर्धा हुँदैछ । कोरोना महामारीले विश्व नै ठप्प भएको बेला घोषणा गरिएको अन्तर्राष्ट्रिय अनलाईन प्रतिस्पर्धामा निर्णायकको रुपमा वरिष्ठ गायक दीप श्रेष्ठ, कन्दरा व्याण्डका चर्चित गायक विवेक श्रेष्ठ र रजिना रिमाल रहेका छन् ।

कार्यक्रमको सञ्चालन पूर्वमिस नेपाल सदिक्षा श्रेष्ठ र मिस नेपाल ओसेनिया २०२० जेमिना श्रेष्ठले संयुक्त रुपमा गर्नेछन् । गायन प्रतिस्पर्धामा निर्णायकको मत नै अन्तिम हुनेछ ।

वरिष्ठ गायक तथा निर्णायक दीप श्रेष्ठले आफ्नै मौलिकताका कारण हल अफ फेम दर्शकहरुको मन जित्न सफल हुने भन्दै देश बाहिर रहेका प्रतिभाहरुले कार्यक्रमबाट विशेष प्रोत्साहन प्राप्त गर्ने बताए ।

हल अफ फेम सिजन २ मा सहभागी हुन कुनै उमेरको बन्देज लगाइएको छैन् भने विश्वका विभिन्न १२ देशबाट प्रतिस्पर्धीहरुले सहभागिता जनाएका छन् । गत नोभेम्बर १५ सम्ममा आएका आवेदनमध्येबाट निर्णायक मण्डलले टप ५० को छनोट गरेका हुन् ।

हिमालय टेलिभिजनमा राति ८ बजेदेखि ९ बजेसम्म प्रशारण हुने हल अफ फेम सिजन २ को समापन आगामी माघ २४ गते शनिबार हुनेछ । कार्यक्रमको निर्माणमा विश्वस्तरको गायन प्रतिस्पर्धाहरुमा आफ्नो कला देखाईसकेका निर्देशक लक्ष्मण पौडेलको संलग्नता छ ।

विजेताले ५ लाख रुपैयाँ बराबरको पुरस्कार पाउनेछन् जसमा १ लाख नगद र गीत रेकर्डिंग, म्युजिक भिडिया निर्माण, अन्तर्राष्ट्रिय प्रवद्र्धन लगायत समावेश छ ।