आकर्षक लाभांश घोषणापछिको पहिलो कारोबारमा नबिल बैंकको सकारात्मक सर्किट

७ पुष, काठमाडौं । नबिल बैंक लिमिटेडले शेयरधनीहरुलाई ३५.२६ प्रतिशत लाभांश वितरण गर्ने हिजो निर्णय गरेसँगै आज दोस्रो बजारमा शेयर खरिद गर्नेको चाप बढेको छ । खरिदकर्ताको अत्याधिक चापका कारण बैंकको शेयर कारोबारमा सकारात्मक सर्किट लागेको छ ।

वाणिज्य बैंकमध्ये आकर्षक नाफा वितरण गरि एक नम्बरमा परेको सो बैंकमा विक्रीकर्ता भन्दा खरिदकर्ताको आकर्षण बढेको हाे । आज बजार खुलेसँगै पहिलो कारोबार ब्रोकर नं. ५२ ले हालेको बिक्री ब्रोकर नं. ४ ले १२९२ मा ४२ कित्ता शेयर किन्दै सुरु भएको थियो ।

बजार क्रमश बढेसँगै अन्तिम कारोबारमा ब्रोकर नं. ७ ले ७०५ कित्ता शेयर १३५४ मा बिक्रीमा हालेको थियो, सो शेयर ब्रोकर नं. ३५ ले खरिद गरेको छ । नबिलको आज कुल २४४ कारोबार हुँदा ४८ हजार २ सय १३ कित्ता शेयर ६ करोड ५१ लाख ९१ हजार २ सय ५२ रुपैयाँमा किनबेच भएको छ ।

विगत तीन आर्थिक वर्ष २०७४/७५, २०७५/७६ र २०७६/७७ मा बैंकले क्रमशः ३४, ३४ र ३५.२६ प्रतिशत लाभांश शेयरधनीलाई दिएको छ । बैंकले आ.व २०७४/७५ र २०७५/७६ मा २२ प्रतिशत नगद र १२ प्रतिशत बोनश शेयर दिएको थियो ।

हिजो सम्पन्न सम्पन्न नबिल बैंक लिमिटेडको संचालक समितिको ५५२ औं बैठकले बैंकको आ.व. २०७६/७७ को मुनाफा मध्येबाट शेयरधनीहरुलाई कर सहितको कुल ३५.२६ प्रतिशत लाभांश (३३.५प्रतिशत बोनश शेयर अर्थात १०० कित्ता बराबर ३३.५ कित्ता तथा कर प्रयोजनको निमित्त १.७६ प्रतिशत नगद लाभांश) वितरण गर्ने निर्णय गरेको छ । उक्त प्रस्तावित लाभांश नेपाल राष्ट्र बैंक तथा बैंकको आगामी ३६औं वार्षिक साधारण सभाको स्वीकृति पश्चात् आवश्यक प्रक्रिया पुरा गरी बैंकका शेयरधनीहरूलाई वितरण गरिने बैंकले जनाएको छ ।

बैंकले आ.व. २०७६/७७ मा निजी क्षेत्रका बैंकहरुमध्ये उच्चतम मुनाफा रु. ३ अर्ब ४६ करोड हासिल गर्न सफल भएको थियो । बैंकले जेथामा प्रतिफल १३.६१ प्रतिशत र प्रति शेयर आम्दानी रु. ३६.१६ हासिल गरी आफ्नो वासलात विस्तार गर्दै रु. २ खर्ब ३८ अर्ब पु¥याएको छ । बैंकको संचालन मुनाफा रु. ५ अर्ब ९ करोड रहेको छ । आ.व. २०७५/७६ मा वित्तिय क्षेञबाट ठूला करदाताहरु मध्ये सबै भन्दा बढी आयकर बुझाउन सफल बैंकको रुपमा नबिल बैंक स्थापित भएको छ । यस बैंकले आधुनिकिकरणलाई आत्मसाथ गर्दै डिजीबैंकको अवधारणालाई समेत अवलम्बन गरेको छ ।

नबिल बैंकले ११९ वटा शाखाहरु, १८५ वटा एटिएमहरुको विशाल संरचना र १५०० भन्दा बढी नबिल रेमिट एजेन्टहरुका साथमा देशव्यापी रुपमा र विश्वभर धेरै एजेन्टहरु मार्फत सेवा प्रदान गरेर आफ्ना सबै सरोकारवालाहरुसंग संगै अघि बढ्ने संस्थागत संचार विभाग प्रमुख कृष्ण सुवेदीले जानकारी दिए ।