को हुन् बहुमत नेकपाको महासचिव बन्ने नेता ?

८ पुष, काठमाडौं । सत्तारुढ नेकपाको बहुमत पार्टीमा नयाँ महासचिवको खोजी शुरु भएको छ । प्रधानमन्त्री केपी शर्मा ओलीलाई अध्यक्षबाट हटाएर माधव नेपाललाई अध्यक्ष तथा प्रचण्डलाई संसदीय दलको नेता चुनेको नेकपाले महासचिव नयाँ नेतालाई छान्ने क्रम शुरु गरेको छ ।

महासचिव बिष्णु पौडेल ओली पक्षतिर लागेपछि प्रचण्ड र नेपाल समूह महासचिवविहिन भएको हो । तर धेरै नेताहरुको आकांक्षा रहेकाले कसलाई महासचिव बनाउने भन्ने अन्यौल छ । नेकपा नेताहरुका अनुसार महासचिवका लागि भीम रावल, सुरेन्द्र पाण्डे, वर्षमान पुन र जनार्दन शर्माको नाम चर्चामा छ।

महासचिवमा प्रचण्डको दबाब रहने भएकाले जनार्दन शर्माले जिम्मेवारी पाउने सम्भावना बढी छ । उनले पार्टी एकतामा विशेष भूमिका खेलेका थिए । प्रचण्डको व्यक्तिगत रोजाईमा वर्षमान पुन र जनार्दन शर्मा छन् ।

नेकपा एक हुँदा पहिलो वरियताका वरिष्ठ नेता रहेका झलनाथ खनालले भने सुरेन्द्र पाण्डेलाई महासचिव बनाउन चाहेका छन् । पार्टी विभाजनमा नेता खनालले त्याग गरेकाले उनले भनेको व्यक्ति नै महासचिव हुने सम्भावना पनि छ ।

उनले आफूभन्दा पछिल्लो वरियतामा रहेका नेपाललाई अध्यक्ष मानेका छन् । यसअघि प्रचण्ड–नेपाल समूहले मंगलबार केन्द्रीय कमिटी बैठक राखेर ओलीलाई पार्टी अध्यक्षबाट हटाएको थियो । बुधबार बसेको उनीहरूको संसदीय दलको बैठकले ओलीलाई संसदीय दलको नेताबाट समेत हटाएर प्रचण्डलाई नयाँ नेता बनाएको छ।

तर महासचिव को बन्छ भन्ने कुरा प्रचण्ड, माधव नेपाल र झलनाथ खनालको आन्तरिक सहमतिमा निर्भर छ ।