बादल ओलीतिर, गौतम प्रचण्ड–माधव कित्तामा

९ पुष, काठमाडौं । नेकपाका दुबै गुटमा यतिबेला नाटकीय ढंगका घटनाक्रम बढिरहेका छन् । पार्टी विभाजन भइसक्दासमेत दुई शीर्ष नेताहरु बामदेव गौतम र रामबहादुर थापा ‘बादल’को संलग्नता प्रष्टिएको थिएन । तर अब भने बादल प्रधानमन्त्रीसमेत रहेका नेकपा अध्यक्ष रहेका केपी ओलीसँगै रहने भएका छन् ।

गौतमले भने अहिलेसम्म कित्ता क्लियर नगरेपनि उनको झुकाव विस्तारै पुष्पकमल दाहाल ‘प्रचण्ड’ र माधवकुमार नेपालतिर ढल्किन थालेको छ । यद्यपि बादल र गौतम दुबै पक्षीय अधिकांश नेताहरु भने प्रचण्ड– नेपाल पक्षमै खुलेका छन् ।  बादलले लामो समय सोचबिचार गरेर नै ओलीसँग लाग्ने निर्णय गरेको निकट स्रोत बताउँछ । तर ओलीले बादललाई आफूपछिको कार्यकारी अध्यक्ष पद दिने प्रलोभन दिएको दाबी स्रोतले गरेको छ ।

हिजो साँझ ओलीसँग भएको फाइनल टकबाटै बादल बालुवाटार प्रवेश गरिसकेको उनी निकट स्रोतले बतायो । विगतमा पनि उनी प्रचण्डसँग बिद्रोह गरेर मोहन वैद्यसँग लागेका थिए । तर पछि प्रचण्डसँगै सहकार्य गर्न एउटा समूह नै लिएर आएका थिए ।  बादल ओलीसँग एक्लै जस्तो पुगेका छन् ।

तर बादल निकट नेताहरु भने प्रचण्डकै खेमामा रहेका छन् । देव गुरुङ , पम्फा भूषाल, महेश्वर दाहाल जस्ता प्रभावशाली नेताहरुले धेरै कन्भिन्स गर्दासमेत बादलले नसुनेको बताइएको छ ।

उता, गौतम भने अब ओलीसँग लाग्दा प्राप्ति भन्दा गुमाउने धेरै भएको ठम्याईमा पुगेका छन् । बादललाई दोस्रो बरियता दिन ओली सहमत भएकाले गौतम तेस्रो नेताका रुपमा बस्न नमानेको स्रोतले बतायो । त्यसैले संभवतः आजैको केन्द्रीय कमिटी बैठकमा गौतम बबरमहल पुग्ने सम्भावना रहेको स्रोतले बतायो ।