ओली सरकारको अतिवादविरुद्ध कडा संघर्ष गर्ने नागरिक अगुवाको चेतावनी

१० पुष, काठमाडौं । संसद विघटन गर्ने प्रधानमन्त्री केपी शर्मा ओली नेतृत्वको सरकारविरुद्ध कडा संघर्ष गर्ने चेतावनी नागरिक समाजका अगुवाले दिएका छन् । बिहीबार काठमाडौंमा बसेको नागरिक समाजका अगुवाको बैठकले ओली सरकारविरुद्ध कडा आन्दोलन थाल्ने चेतावनी दिएको हो ।

गएको आइतबार संसद विघटन गरेको प्रधानमन्त्री ओलीको अहिले चौतर्फी आलोचना भइरहेको छ । नागरिक समाजका अगुवाले पनि ओली सरकार असक्षम सावित भएर अतिवाद लागु गर्न खोजिरहेको भन्दै कडा शब्दमा आलोचना गरेको हो ।

‘नेपाललाई विभिन्न राजनीतिक वादहरुको प्रयोगशाला बनाई हरेक दृष्टिकोणले अस्थिर र असफल राष्ट्र उन्मुख बनाईदै आएको सर्वविदितै छ । मन्त्रिपरिषदले वर्तमान संसद सघटन सम्बन्धी प्रस्ताव राष्ट्रपतिद्वारा स्वीकृत भएकोमा सो कार्य अदृश्य आडमा असंबैधानिक तरिकाले स्वीकृत गराएबाट समेत विद्यमान व्यवस्था र संविधान असफल भएको तथा सरकार र राजनीतिक नेतृत्व पंक्ति समेत आफै असक्षम सावित भएको ठहर गरियो’ १६ जना नागरिक अगुवाद्धारा जारी विज्ञप्तीमा भनिएको छ । साथै उनीहरुले संसद विघटनविरुद्ध कडा आन्दोलन थाल्नुपर्ने भन्दै संसद पुनःस्थापनका लागि गरिने आन्दोलनमा सहभागी हुन आग्रह गरेका छन् ।

‘नेपालको पहिचान, विकास र स्वाधिनताको लागि औचित्यपूर्ण ठहर गर्दै तत्काल सर्वपक्षीय राजनीतिक सहमति जुटाई हिमाल, पहाड र तराईमध्ये ४० उपयुक्त समय आईसकेको ठहर गरि देशलाई सनातन संस्कृति र संवैधानिक प्रबल राज संस्था र जनतन्त्र नै २१ औं शताब्दीको नेपालको पहिचान, विकास र स्वाधिनताको लागि औचित्यपूर्ण ठहर गर्दै तत्काल सम्पूर्ण राष्ट्रवादी, देशभक्त लगायत जनतन्त्र प्रेमीहरु मातृभूमि नेपालको राष्ट्रिय झन्डाको मुनि गोलबद्ध भई जस्तोसुकै एतिहासिक कदमका रुपमा संयुक्त नागरिक आन्दोलनको आगामी कार्यक्रमहरुमा सशक्त रुपमा संचालन गर्न गराउन समेत सबैलाई समेटेर यथाशिघ्र नेतृत्व पंक्तिहरुको चयन तथा जिम्मेवारी निश्चित गरिनेछ ।’ विज्ञप्तीमा थप अगाडी भनिएको छ ।

संसद विघटनविरुद्ध एक ठाउँमा उभिएका नागरिक अगुवा

१. डा. ठाकुरमोहन श्रेष्ठ : राष्ट्रिय संयोजक नेपाल नागरिक अभियान
२. डा. मनोज कुमार झा : राष्ट्रिय संयोजक राष्ट्र बचाउ अभियान
३. दिनेश कंडेल : राष्ट्रिय सह संयोजक शिव सेना नेपाल
४. पुर्व मन्त्रि सुसिल शेरचन : महामन्त्रि नेपाली कांग्रेस, बीपी
५. हेमाबिक्रम सिलवाल : संयोजक स्वतन्त्र नागरिक समाज
६. शेखरजंग रायमाझी : संयोजक पुनरुत्थानवादी शक्ति नेपाल
७. एस तुलाधर : क्षेत्रीय सभापति सनातन संस्कृति समाज नेपाल
८. श्रीमती उमा श्रेष्ठ हिमा : राष्ट्रिय अध्यक्ष राष्ट्रवादी एकता पार्टी
९. दिवाकर बिक्रम शाह : संस्थापक बहादुर शाह प्रतिष्ठान
१०. मुनिन्द्र राजभन्डारी : संस्थापक संरक्षक शाही शक्ति नेपाल
११. डा आत्माराम उप्रेती : ज्योतिषविद विश्व हिन्दु एकता परिषद
१२. मिनराज गुरुङ : राष्ट्रिय संयोजक राष्ट्रिय जनजागरण अभियान
१३. अनिल कुमार थापा : वीर गोर्खाली
१४. हरिहर शर्मा : संयोजक स्वतन्त्र राष्ट्रवादी एकता मंच
१५. श्रीकृष्ण श्रेष्ठ : संयोजक शाही युवा शक्ति, नेपाल
१६. सुरेन्द्रजंग रायमाझी : केन्द्रिय अभियन्ता नेशनल मुभमेन्ट