डेढ करोड फिरौती लिएर भागेका बुढाथोकी १२ बर्षपछि पक्राउ

१४ पुष, काठमाडौं । व्यक्ति अपहरण गरेर डेढ करोड रुपैयाँ फिरोती लिएर भागेका दुर्गा बुढाथोकी १२ बर्षपछि पक्राउ परेका छन् । सर्लाही घर भएका बुढाथोकी १२ बर्षपछि इलामबाट पक्राउ परेका हुन् ।

उनले २०६५ सालमा बाबुराजा रावललाई अपहरण गरी डेढ करोड रुपैयाँ फिरौती असुलेका थिए । फिरौती पाएपछि रावललाई छाडेका उनी त्यसयता फरार थिए । दर्जन बढीको युवाहरु मिलेर अपहरण गरेपछि फरार रहेका उनी १२ बर्षपछि इलामबाट भारतको सीमा नजिकबाट पक्राउ परेका केन्द्रिय अनुसन्धान ब्युरो सीआईबीले जनाएको छ ।

यस्तै एभरेष्ट होटलको पार्किङबाट मोटरसाइकल चोरी गरेको आरोपमा पक्राउ परी बानेश्वरको प्रहरी हिराशत फोडेर फरार रहेका दुई जना पनि पक्राउ परेका छन् । पक्राउ पर्ने प्रकाश क्षेत्री हुन् । उनी उदय सेठ्ठी र अमर टण्डनको ग्रुपमा रहेर अपहरण गर्ने अपराधमा पनि सक्रिय रहेको प्रहरीले जनाएको छ ।