सरकार जस लिन खोज्ने,अपजस नलिने फट्याइँ नगरौं : नेता गुरुङ

१७ पुष, काठमाडौं । नेपाली कांग्रेसका केन्द्रिय सदस्य धनराज गुरुङले अरुण तेस्रो जलविद्युत आयोजना नबनेका कारण देश अहिले पनि लोडसेडिङमुक्त नभएको बताएका छन् । अहिले भारतबाट विद्युत आयात गरेर लोडसेडिङ हटाइएको दाबी गरेपनि २० बर्ष पहिले नै बन्नुपर्ने अरुण तेस्रो जलविद्युत आयोजना नबन्दा देश लोडसेडिङमुक्त नभएको बताएका हुन् ।

तत्कालिन नेकपा एमालेकै अवरोधका कारण अरुण तेस्रो जलविद्युत आयोजनाको काम अघि नबढेको पनि नेता गुरुङको दाबी छ । पछिल्लो केही दिनयता पटक पटक बिजुली गइरहेका बेला नेपाल विद्युत प्राधिकरणका पूर्व प्रमुख कुलमान घिसिङलाई धेरैले सम्झिरहेका छन् ।

तर प्रधानमन्त्री ओली पक्षका धेरै नेताहरु भने लोडसेडिङ हटाउने काम कुलमानले नभई ओलीले गरेको दाबी गर्ने गरेका छन् । यसै सन्दर्भमा पूर्व सांसद समेत रहेका नेता गुरुङले लोडसेडिङ हट्न नसक्नुको वास्तविक कारणबारे खुलाएका हुन् ।

‘भारतबाट विद्युत आयात गरेर लोडसेडिङ हटाएकोमा जस लिन तँछाडमछाड गर्नेहरुले तत्कालीन नेकपा एमालेको अवरोधका कारण २० वर्ष पहिले बन्ने अरुण तेश्रो नबनेपछि लोडसेडिङ भोग्नुपरेको र मुलुकको बिकासमा ठेस पुर्‍याएको कुराको अपजस पनि लिन तयार हुनु पर्दैन’ नेता गुरुङले फेसबुकमा प्रश्न गर्दै भनेका छन्, ‘जस लिन खोज्ने, अपजस नलिने फट्याइँ नगरौं।