नेकपा जिल्ला जिल्लामा दुई फ्याक, प्रचण्ड–माधव पक्षकै वर्चश्व

१९ पुष, काठमाडौं । नेपाल कम्युनिष्ट पार्टी औपचारिक रुपमा विभाजनको घोषणा भएको छैन, तर प्रभाव भने वडा तहसम्म पुगिसकेको छ । केन्द्रमा केपी ओली र पुष्पकमल दाहाल ‘प्रचण्ड’–माधवकुमार नेपाल पक्षमा नेताहरु विभक्त भएका छन् । तर निर्वाचन आयोगले अहिलेसम्म कुन दलले आधिकारिकता पाएको भन्ने खुलाएकाे छैन । तथ्य प्रमाणमा छानविन भइरहेको जनाइएको छ ।

तर जिल्ला तहमा भने केन्द्र जस्तै नेतृत्व विभाजित छ । कुल ७७ जिल्ला मध्ये ४४ जिल्लाका अध्यक्ष प्रचण्ड–माधव पक्षमा खुलेका छन्, भने ओली पक्षमा ३१ जना अध्यक्षले समर्थन जनाएको अवस्था छ । बाँकी दुई जिल्लामा धनकुटाका राजेन्द्र राई अहिले कतैपनि खुलेका छैनन् भने धादिङका नेत्र पौडेल विरक्तिएर राजनीतिबाटै सन्यास लिने अवस्थामा पुगेका छन् ।

जिल्ला तहमा हेर्दा ओली भन्दा प्रचण्ड–माधव समूह नै बलियो देखिन्छ । यस्तै सचिवहरुमा त ६३ जिल्लामा प्रचण्ड–माधव समूहको वर्चश्व देखियो । मात्र १२ जिल्ला सचिवले ओलीलाई समर्थन गरेका छन् । जिल्ला तहको यो तस्बीरले ओलीलाई कमजोर देखाएको छ । तर जानकारहरु भन्छन्– निर्वाचन आयोगले पार्टीको आधिकारिकता र चुनाव चिन्ह् सूर्य टुंग्याएपछि अहिलेको समीकरणमा फेरबदल आउन सक्छ ।

ओली पक्षले अहिले सबै शक्ति केन्द्रमै खर्च गरेकाले पनि यस्तो चित्र देखिएको बताइन्छ । जिल्ला तहमा ओली पक्षले पेनिट्रेसन सुरु ग¥यो भने बेग्लै तस्बीर आउन सक्छ ।  एकजना ओली पक्षीय केन्द्रीय सदस्यका अनुसार, अहिले जिल्लामा देखाइएको यस्तो चित्र पानीको फोका मात्रै हो , कुनैपनि बेला तस्बिर बदलिन सक्छ ।  सातवटा प्रदेशमा रहेका नेताहरुलाई नियाल्दा यस्तो तस्बिर देखापर्छ ।

प्रदेश नं. १

यो प्रदेशमा रहेका १४ जिल्लामध्ये ७ वटा जिल्लामा प्रचण्ड–माधव पक्षका अध्यक्ष खुलेका छन् । यस्तै ६ जना भने ओली पक्षका देखिएका छन् । धनकुटाका एकजना भने कतै खुलेका छैनन् । रमाइलो त के छ भने इलामका अध्यक्ष राम राना ओली पक्षमा लागेका छन् । उनी वरिष्ठ नेता झलनाथ खनालका खास मान्छे हुन् ।

यो प्रदेशमा प्रचण्ड–नेपाल पक्षमा खुलेका जिल्ला अध्यक्षमा ताप्लेजुङका खेलप्रसाद बुढाथोकी, सुनसरीका योगेन्द्र मण्डल,तेह्रथुमका लक्ष्मण तिवारी,संखुवासभाका हेमराज घिमिरे, उदयपुरका विनोद कटवाल,खोटाङका पवन चाम्लिङ र ओखलढंगाका मोहन खड्का रहेका छन् । यस्तै ओली समूहमा पाँचथरका राजकुमार भण्डारी, इलामका राम राना,झापाका चिन्तन पाठक , मोरङका ऋषिकेश पोखरेल, भोजपुरका प्रेमकुमार राई र सोलुका मानवीर राई देखिएका छन् ।

प्रदेश नं. २

यसमा  पनि प्रचण्ड –नेपाल पक्षकै वर्चश्व देखिएको छ । जसमा सप्तरीका अशोककुमार मण्डल,सिरहाका रामकुमार यादव,महोत्तरीका राजु खड्का,सर्लाहीका रेवती पन्त, बाराका कमल यादव र रौतहटका छत्रबहादुर श्रेष्ठ रहेका छन् । यस्तै आली पक्षमा खुलेकाहरुमा धनुषाका राजकिशोर यादव र पर्साका प्रभु हजारा मात्रै रहेका छन् ।

बाग्मती प्रदेशमा पनि ओली पक्ष कमजोर नै छ । यो प्रदेशका १३ जिल्लामध्ये ८ जिल्लामा प्रचण्ड–नेपाल पक्षको हावी छ भने ४ जिल्लामा ओली पक्षका अध्यक्ष खुलेका छन् । प्रचण्ड–नेपाल पक्षमा खुलेकामा चितवनका यमबहादुर परियार,सिन्धुलीका राजन दाहाल,नुवाकोटका हिमलाल खतिवडा,काभ्रेका रुकु चौलागाईं,रामेछापका मदनकुमार मोक्तान ,सिन्धुपाल्चोकका झंक नेपाल,मकवानपुरका मुनु सिक्देल र रसुवाका कन्याल तामाङ रहेका छन् ।

उता, ओली पक्षमा खुलेकामा काठमाडौंका कृष्ण राई,ललितपुरका हरिकृष्ण व्यञ्जन, भक्तपुरका वचन देउजा र दोलखाका ईश्वर पोखरेल रहेका छन् । यस्तै धादिङका नेत्र पौडेलले भने विरक्तिएर राजनीतिबाटै सन्याल लिएका छन् ।  गण्डकी प्रदेशमा भने ओली पक्ष केही बलियो छ । ११ मध्ये ७ जिल्ला अध्यक्ष ओली पक्षमा खुलेका छन् भने बाँकी अर्काे पक्षमा ।

ओली पक्षमा देखिएकाहरुमा कास्कीका कृष्ण थापा,तनहुँका केदार सिक्देल,मुस्ताङका चन्द्रमोहन गौचन,मनाङका पाल्तेन गुरुङ, पर्वतका पदम गिरी,स्याङ्जाक सूर्यप्रसाद गैरे पूर्वी नवलपरासीका रोशन गाहा रहेका छन् । यस्तै प्रचण्ड –माधव समूहमा देखिएकाहरु मध्ये लम्जुङका मधु अधिकारी,गोरखाका लेखबहादुर थापा, म्याग्दीका गोविन्द पौडेल र बाग्लुङका इश्वरप्रसाद सापकोटा रहेका छन् ।

यस्तै लुम्बिनी प्रदेशमा भने दुबै पक्ष बराबरीमा देखिएका छन् । दबै पक्षमा छ छ जना अध्यक्ष खुलेका छन् । ओली पक्षमा देखिनेमा प्युठानका तुलसीराम शर्मा, अर्घाखाँचीका चेतनारायण आचार्य,गुल्मीका मधुकृष्ण पन्त,पाल्पाका नारायण आचार्य,रुपन्देहीका शिवराज सुवेदी र कपिलवस्तुका झवीलाल पोखरेल रहेका छन् ।

उता, अर्काे पक्षमा भने रोल्पाका सुरेन्द्र घर्ती,रुकुम पूर्वका मेघबहादुर श्रेष्ठ, नवलपरासी पश्चिमका भविश्वर तिवारी,दाङका टीकाराम खड्का, बाँकेका आईपी खरेल र बर्दियाका भवनकुमार थारु रहेका छन् । यसैगरी कर्णाली प्रदेशका १० जिल्लामध्ये ८ वटामा प्रचण्ड–माधव समूहको दबदबा छ । जसमा सुर्खेतका ध्रुव शाही, जाजरकोटका ढकबहादुर राना,रुकुम पश्चिमका गोपाल शर्मा, जुम्लाका वीरबहादुर कुँवर,कालीकोटका धनजित शाही,हुम्लाका लालकेश जैसी,डोल्पाका दत्तबहादुर रोकाय र मुगुका सूरबुढा रहेका छन् ।

दैलेखका रवीन्द्र शर्मा र सल्यानका गोविन्द पुन मात्रै ओली पक्षमा उभिएका छन् । यसैगरी सुदूरपश्चिमका ९ जिल्लामध्ये ५ वटामा प्रचण्ड–माधव पक्षकै बर्चश्व रहेको छ । जसमा दार्चुलाका गणेशसिंह ठकुरी, डंडेल्धुराका मानसिंह माल,बझाङका मीनबहादुर कुँवर,अछामका शेरबहादुर कुँवर र डोटीका चक्रबहादुर मल्ल रहेका छन् । यस्तै ओली पक्षमा भने वैतडीका सुरन्द्र पाल,बाजुराका कालीबहादुर शाही,कैलालीका रतन थापा र कञ्चनपुरका वीरवहादुर थापा रहेका छन् ।