काेराेना संक्रमण पश्चात विद्यालयमा पहिलो रक्तदान कार्यक्रम सम्पन्न

१९ पुष, काठमाडौं । समृद्धि स्कुल बालाजुको क्लब २५, समृद्धि च्याप्टर, चःमति नेवाः खलः र किलाघः त्वा मिसा पुचः को संयुक्त आयोजनामा समृद्धि स्कुल बालाजुमा शनिबार एक बृहत रक्तदान कार्यक्रम सम्पन्न भएको छ । यस कार्यक्रममा संलग्न रेडक्रस प्रतिनिधिका अनुसार कोभिड १९ को संक्रमण पश्चात बिद्यालयमा सम्पन्न भएको यो पहिलो रक्तदान कार्यक्रम हो ।

उक्त कार्यक्रममा ७३ जना बिद्यार्थि, अभिभावक तथा स्थानिय दाताहरूले रक्तदान गर्नुभएको थियो । समृद्धि स्कुल बालाजुको क्लब २५ का बिद्यार्थिहरूले व्यवस्थापन गरेको उक्त कार्यक्रममा रक्तदाताहरू तथा सहयोगी संस्थाहरूलाई समृद्धि स्कुलका सि.ई.ओ- प्रिन्सीपल नरेशप्रसाद श्रेष्ठ, चःमति नेवाः खलःका अध्यक्ष पुर्णकाजी ज्यापु लगायतले प्रमाणपत्र वितरण गरेका थिए ।

उक्त समाहरोहमा सि.ई.ओ- प्रिन्सीपल श्रेष्ठले, युवाहरूलाई स्वच्छ र स्वस्थ जिवनशैली अपनाई रक्तदानको माध्यमबाट मानवसेवा तथा जिवनदान गर्न सघाउने उद्देश्यले विश्व स्वास्थ संगठन (डब्लु.एच.ओ.) ले क्लब २५ को अवधारणा ल्याएको जानकारी बिद्यार्थि तथा स्वयंसेवकहरूलाई गराए ।