बामदेवकाे गोरु ब्याउने अभियान कि तेस्रो धार निर्माण ?

२६ पुष, काठमाडाैं । विभाजनको औपचारिक घोषणा भइनसकेपनि अब नेकपा सग्लो पार्टी बन्ने आधार गुमाइसकेको छ , तर त्यही पार्टीमा उपाध्यक्षसमेत रहेका बामदेव गौतम भने गोरु ब्याउने अभियानमा जुटेका छन् । धेरैले पत्याएका छैनन् – बामदेवमा त्यो तिलस्मी क्षमता छ भनेर । तर गौतम अहिले नेकपा एकजुट गराउने राष्ट्रिय अभियान सञ्चालनको गृहकार्यमा छन् ।

प्रधानमन्त्री केपी ओली र नेताहरु पुष्पकमल दाहाल प्रचण्ड–माधवकुमार नेपाल पक्षमा खुलेकाहरु सकेसम्म पार्टी विभाजन नै नभइहालोस् भन्ने पक्षमै थिए । तर नेताहरुको सत्तास्वार्थ र पद व्यवस्थापन नभएकाले पार्टी विभाजनको तहमा पुगेको हो । त्यसैले बामदेव अब एक व्यक्ति एक पद अभियान सञ्चालन गर्न अग्रसर भएका छन् ।

अस्थिर र चञ्चले स्वभावका बामदेवलाई दुबै खेमाका नेताहरुले उक्साएका छन्– कम्रेड लाग्नुहोस्, तपाईंको अभियानमा हाम्रोपनि साथ रहनेछ । त्यसैको भर परेका हुनसक्छन् गौतम ।  गौतमले चाहे अनुसार नेकपा तत्कालै एकजुट हुने आधार देखिएको छैन । कम्तिमा एउटा चुनावसम्म त नेताहरु एकैथलोमा बस्न सक्ने अवस्थामा छैनन् ।

यो कुरा स्वयं गौतमलाई पनि ज्ञात छ । त्यसैले उनी मझधारमै बसेर दुबै पक्षको तर मार्न लालयित छन् । ओली सत्तामा रहेकाले उनीसँग टाढिन मन छैन गौतमलाई , तर तन भने प्रचण्ड–माधवसँग निकट रहन आतुर छ । त्यसैले केही समय पर्ख र हेरको अवस्थामा छन् गौतम ।

कम्तिमा सर्वाेच्च अदालतको फैसला र निर्वाचन आयोगको निर्णय नआएसम्म गौतम कतै खुल्ने अवस्थामा देखिएनन्– निकटवर्ती स्रोत भन्छ । गौतमले यस्तो खेल खेलेर दुबै पक्षलाई अलमल्याउने काम गरेका छन् । साथै, यही निहुँमा उनी तेस्रो गुट निर्माण गर्न उद्यत् भएको बुझ्न सकिन्छ ।

नेकपाको दुबै गुटमा लागेर दुनो सोझ्याउन सफल भएका गौतम अहिले गुटविहीन छन् । त्यसैले उनी गुट नबनाई पार्टीमा हैकम गर्न नसकिने निचोडमा पुगेका छन् । त्यही निश्कर्षलाई बल दिन उनी तेस्रो गुट निर्माण गर्न कस्सिएका हुन्– एक नेताको भनाई छ ।

गौतमले दुबै पक्षलाई एकैथलोमा ल्याउने कुनै जादूको छडी चलाउने ल्याकत राख्दैनन् , अहिलेको विवाद वडा तहसम्म पुगिसकेकाले एकजुट हुने कुनै सम्भावना नै छैन । त्यसैले गौतम यही मुद्धालाई बोकेर सहानुभूतिको राजनीति गर्न लागिपरेका हुन् – ती नेताले भने । चुनाव भएपनि वा पुनस्थापना भएपनि केही नेता आफ्नो पक्षमा देखाएर दुबै पक्षसँग बार्गेनिङ गर्ने गौतमको सोच रहेको देखिन्छ ।