मैले अवसर दिएँ, सिंहले म आफैँलाई झम्टने काम गर्याे : ओली

२६ पुष, काठमाडौं । प्रधानमन्त्री केपी ओलीले सरकारले गरेको प्रगतिप्रति इर्ष्या र डाहले केही व्यक्ति आफूविरुद्ध षड्यन्त्रमा लागेको आरोप लगाएका छन् ।

आफू पहिलोपटक प्रधानमन्त्री बनेको समयमा विकास निर्माणको काम अगाडि बढाउँदा छटपटी भएर सरकार ढालिएको र अहिले पनि उनीहरू आफूविरुद्ध लागेको आरोप ओलीले लगाए ।

आइतवार राष्ट्रियसभा बैठकलाई सम्बोधन गर्दै ओलीले देशविरुद्ध अस्थिरता फैलाउने षड्यन्त्र बढेपछि भारी मन लिएर प्रतिनिधिसभा विघटन गरेको दावी गरेका छन् ।

‘सरकारले गरेका राम्रा कामप्रति इर्ष्या र डाहले केही मान्छे लागे । निर्वाचनबाट आएको प्रधानमन्त्रीलाई षड्यन्त्र गरेर बीचमा हट्नुपर्छ भने,’ ओलीले भने, ‘मैले अवसर दिएँ । त्यही अवसरबाट सिंह बनाइदियो, सिंहले म आफैँलाई झम्टने काम गर्याे ।’

 आइतबार दिउँसो १ बजेपछि बसेको बैठकमा प्रधानमन्त्री ओली बोलिरहेका छन् । आफ्नो सरकारले तिब्र गतिमा काम गरिरहेको समय आफूविरुद्ध पार्टीमा गुटबन्दी गरिएको उनले बताएका छन् ।

प्रधानमन्त्री ओलीले पुष ५ गते प्रतिनिधि सभा भंग गरेका थिए। उक्त कदम सच्याउन नेपाली कांग्रेस, नेकपाकै प्रचण्ड-नेपाल र जसपालगायत दलले माग गरिरहेका छन् ।

तस्विर : प्रधानमन्त्रीका प्रेस सल्लाहकार सुर्य थापाको फेसबुकबाट साभार