नेविसंघको एउटै स्वर, सरकार भित्र चोरै–चोर !

१ माघ, काठमाडौं । संसद विघटनको विरोधमा नेपाली कांंग्रेस सम्बद्ध विद्यार्थी संगठन नेविसंघले बिहीबार काठमाडौंको माइतीघरमा विरोध प्रदर्शन गरेको छ । संसद विघटन अलोकतान्त्रिक र असंवैधानिक भन्दै शंकरदेव क्याम्पसका नेविसंघ सम्बद्ध बिद्यार्थीहरुले काठमाडौंको माइतिघरमा विरोध प्रदर्शन गरेका हुन् ।

प्रदर्शनमा सहभागी बिद्यार्थीहरुले मुखमा कालो मास्क, निधारमा कालो फिता र त्यसमा नारा लेखेर प्रदर्शन गरेका थिए भने शरीरमा नारा लेखिएको कालो कपडा लगाएका थिए । युवा विद्यार्थीले ‘भ्रस्टाचारी केपी ओली मुर्दावाद, खोक्रो राष्ट्रवाद बन्द गर, असंवैधानिक कदम खारेज गर, विद्यार्थीको एउटै स्वर सरकार भित्र चोरै–चोर’ जस्ता नारा लेखिएका प्ले कार्ड प्रदर्शन गरेका थिए ।

बिरोध सभालाई सम्बोधन गर्दै नेबिसंघ महामन्त्री बलदेव तिमल्सिनाले केपी ओलीले ब्याप्त भ्रष्टाचार लुकाउन र खुलेआम भ्रष्टाचार गर्न संविधान विपरित प्रधानमन्त्रीले संसद विघटन गरेको भन्दै अहिलेको कदम अधिनायकवाद र प्रतिगामी भएकोले विरोधका कार्यक्रमलाई निरन्तरता दिने जनाएका छन् ।

नेपाल विद्यार्थी संघ शंकरदेव क्याम्पसद्वारा आयोजित प्रतिकात्मक बिरोध प्रदर्शन कार्यक्रमको सम्योजन नेता दीपक ओझाले गरेका थिए भने बिभिन्न रचनात्मक तथा प्रतिकात्मक नाराहरुसहित कालो कपडाले शरीर बेरेर संघका नेताहरु दीपक ओझा, सुदिप बनाडी, दिल सैनाई ,सुनिल पराजुली,आदित्य काफ्ले समेत ५ जना सडकमा सुतेका थिए ।

संघका नेता मिलन खतिवडाले संचालन गरेको बिरोध सभामा संघका महामन्त्री युवराज पाण्डे, पुर्ब केन्द्रीय सदस्यहरु सुशील भट्ट, रत्नहरी ढुंगेल, नेताहरू बिपिन अधिकारी लगाएतले असंबैधानिक कदमका बिरुद्ध सशक्त प्रतिवाद गर्नुपर्ने बताएका थिए । नेबिसंघले भोलि केन्द्रीय परिपत्र बमोजिम भोलि देशैभर दौड जुलुस गर्दैछ ।