संक्रमित व्यक्ति अर्को पाँच महिनासम्म संक्रमण हुनबाट बच्ने

२ माघ, काठमाडौं । एक पटक कोरोना भाइरसबाट संक्रमित भएको व्यक्ति कम्तीमा अर्को पाँच महिनासम्म संक्रमण हुनबाट बच्ने एक अध्ययनले देखाएको छ । संक्रमण नभएका व्यक्तिको तुलनामा एक पटक संक्रमित भएका व्यक्तिलाई फेरि संक्रमण हुने सम्भावना ८३ प्रतिशतले कम हुने पब्लिक हेल्थ इङ्ग्ल्यान्डको एक अध्ययनले देखाएको छ।

तर विज्ञहरूका अनुसार कोरोना भाइरसको संक्रमण दोहोर्याएर हुनसक्ने र अरूलाई सार्न सक्ने सम्भावना भने रहेको बीबीसीले जनाएको छ ।बेलायतका झन्डै २१ हजार स्वास्थ्यकर्मीको नियमित परीक्षणको नतिजामा यो अध्ययन गरिएको थियो । तीमध्ये पहिले संक्रमण नभएका व्यक्तिहरूमध्ये ३ सय १८ जनालाई संक्रमण भएको र संक्रमित भएर निको भएका ६ हजार ६ सय १४ जनामध्ये ४४ जनालाई मात्रै फेरि संक्रमण भएको थियो । वैज्ञानिकहरूले ती स्वास्थ्यकर्मीहरूको स्वास्थ्य अवस्थाको एक वर्षसम्म अध्ययन गर्ने छन् ।

नयाँ अध्ययनको नेतृत्व गरेकी प्राध्यापक सुसन हप्किन्सले अध्ययनको नतिजाले निको भएका संक्रमितहरू यसअघि सोचिएभन्दा लामो समय बच्न सक्ने बताए । तर दोहोर्याएर हुनै नसक्ने भन्ने नभएकोले सुरक्षाका उपायहरू अपनाउन पर्ने हप्किन्सको भनाइ छ ।

पुनः संक्रमित भएका केहीमा लक्षण नदेखिए पनि भाइरसको मात्रा ज्यादै धेरै भएको र अरूलाई सार्न सक्ने देखिनु चिन्ताको विषय भएको हप्किन्सले बताए ।