चन्द्रागिरि हिल्स कम्पनीको आईपीओ बाँडफाँड बारे यस्तो भन्छ-बिक्री प्रबन्धक ?

४ माघ, काठमाडौं । चन्द्रागिरि हिल्स कम्पनीले दोस्रो चरणमा सर्वसाधारणको लागि निष्कासन गरेको आईपीओ यही साताभित्र बाँडफाँड गरिने बिक्री प्रबन्धक ग्लोबल आइएमई क्यापिटलले जनाएको छ । कम्पनीले दोस्रो चरणमा सर्वसाधारणको लागि १५ लाख ३४ हजार कित्ता आईपीओ निष्कासन गरेको हो । कम्पनीले गत २४ गते देखि २८ गतेसम्म सर्वसाधारणका लागि सो आईपीओ खुल्ला गरेको थियो ।

हालसम्म नेपालको इतिहासमै सबैभन्दा बढी आवेदन परेको उक्त कम्पनीको आईपीओमा १२ लाख ५१ हजार ९३८ जनाको आवेदन परेको छ । जसमध्ये ४ प्रतिशत अर्थात ६१ हजार ३ सय ६४ कित्ता कम्पनीका कर्मचारीलाई, ५ प्रतिशत अर्थात ७६ हजार ७ सय ५ कित्ता म्युचुअल फण्डहरूलाई र बाँकी १३ लाख ९६ हजार २२ कित्ता सर्वसाधारणको लागि निष्कासन गरिएकाे थियाे ।

कम्पनीको आईपीओमा उल्लेख्य मात्रामा आवेदन परेकाले आवेदन दिनेमध्ये ८८ प्रतिशत भन्दा बढी लगानीकर्ताहरुको हात खाली हुने भएको छ ।

कम्पनीको शेयर कम्तीमा १० कित्ता प्रतिव्यक्तिलाई वितरण गर्दा उत्त कम्पनीको आईपीओ १ लाख ३९ हजार ६ सय २ जना लगानीकर्ताहरुले मात्र पाउनेछन् भने बाँकी २ कित्ता १० कित्ता भन्दा बढी आवेदन दिनेहरुमध्यबाट गोलाप्रथाद्धारा दुई जनामा वितरण गरिने क्यापिटलले जनाएको छ ।