नागढुङ्गामा प्रहरीको असुली धन्दा

९ माघ, काठमाडौ । थानकोट र नागढुङ्गाको प्रहरी चेकपोष्ट भनेपछि असुलीका लागि प्रख्यात भनेर जमानादेखि परिचित हुँदै आएको छ । थानकोट वृत्तमा जान मरिहत्ते गर्ने प्रहरी प्रमुखमा केही समय अघि घनश्याम श्रेष्ठ थिए ।

हालै मात्र महानगरीय प्रहरी वृत्त थानकोटका प्रहरी निरीक्षक घुसकाण्डमा निलम्बनमा परे । तर थानकोट वृत्त मातहतको नागढुङ्गामा भने प्रहरीको असुली खुलेयाम हुँदाहुँदै पनि नियन्त्रणतर्फ कसैले चासो नदिएको बताइएको छ । पहिले असई र सई इन्चार्ज हुने नागढुङ्गामा अहिले इन्सपेक्टर बस्ने गरेका छन् ।

नागढुङ्गाका प्रहरी निरीक्षक हुन हेमन्तबिक्रम थापा । उनले अति नै विश्वास गरेर घुमुवाका रुपमा राखेका छन्, हवल्दार कमल खड्कालाई । बालाजु प्रहरी वृत्त दरबन्दी भएर काजमा नागढुङ्गा गएका हवल्दार खड्का सिपाही हुँदा पनि नागढुङ्गा नै बसेका कारण उनले तस्करदेखि व्यापारीसम्म अधिकांशलाई चिन्दछन् । जसका कारण निरीक्षक थापाले उनलाई रकम उठाउने जिम्मा दिएको र उठेपछिको रकम साठी/चालिसको दरले बाड्ने गरेको समेत बताइएकाे छ।

हवल्दार भएपछि दुई बर्ष र सिपाही हुँदा एक बर्ष गरी नागढुङ्गामा तीन बर्ष बस्न सफल खड्काले जुनियर हुँदाहुँदै पनि क्वाटर माष्टर चलाएका छन् । कसैको संरक्षण भएको कारण नै खुलेयाम असुली हुँदाहुँदै पनि असुली गर्नेलाई न त कारवाही हुन्छ न त हटाउने काम नै । निरीक्षक थापा बालकोटका भएकोले आईजीपी शैलेश थापादेखि नेता महेश बस्नेतसम्मको संरक्षण रहेकोले पनि त्यही आडमा हवल्दार कमल खड्काको चुरिफुरी बढेको र जति असुली गरेपनि कारवाही त परै जावोस हटाउने काम पनि नभएको नाम नबताउने शर्तमा एक असईले जानकारी दिए ।

महेन्द्रनगर र भद्रपुरबाट काठमाडौ आउने बसहरूमा तस्करीको कपडा, रेडबुल , सूर्ति लगाएका सामान आउँछन। त्यस्ता सामानको आधाको बिल हुने र आधाको बिल हुँदैन । त्यस्ता हरेक बसहरूबाट दश हजारका दरले रकम असुल्ने काम खड्कामार्फत हुने गरेको उजुरी मेट्रो र मुख्यालयसम्म पुगेपनि कुनै छानबिन नभएको कार्यरत प्रहरी नै बताउँछन् ।

यसका अलवा देउराली भन्ने ठाउँमा मोहन तामाङको ढुङ्गाखानी छ । उक्त ढुङ्गाखानी वडाले स्वीकृत दिएपनि चन्द्रागिरी नगरपालिकाले दिएको छैन् । उक्त ढुङ्गाखानीबाट दैनिक १२/ १३ वटा ट्रिपर चल्छ। त्यसबाट समेत खड्काले रकम असुली गर्ने गरेको उजुरी परेपनि केही नभएको प्रहरी नै बताउँछन् ।