शीतलहरबाट जनता बचाउन अघि बढे बिद्यार्थी नेता मिश्र

२० माघ, सर्लाही । जनता समाजवादी पार्टी नेपालनिकट राष्ट्रिय विद्यार्थी संघका केन्द्रीय अध्यक्ष मनिष मिश्रको अगुवाईमा सर्लाहीमा मानवीय सहायताका काम शुरु भएको छ । आज मंगलबारदेखि रामनगर गाउँपालिकाभरिका असहाय तथा विपन्नलाई कम्बल वितरण सुरु भएको हो ।

तराई–मधेशमा केही दिनदेखि बढेको अत्याधिक चिसोका कारण जनजीवन एकदम प्रभावित भएको छ । शीतलहर र अत्याधिक चिसोका कारण सबैभन्दा बढी प्रभावितमा बृद्ध, विपन्न तथा असहायहरु भएका छन् ।

जिल्लाको रामनगर गाउँपालिकामा रहेका विपन्न तथा असहाय, वृद्ध, एकल महिला तथा अपाङ्गहरूलाई जाडोमा न्यानो स्वरूप कम्बल वितरण गर्ने कार्य शुरू गरिएको अध्यक्ष मिश्रले बताए । नेता मिश्रले उक्त कार्य गाउँपालिका भित्रका सम्पूर्ण टोलहरूमा कम्बल वितरण गर्ने योजना रहेको बताएका छन् ।