कांग्रेस बैठक बस्दै, नेताहरुको रणनीति आ-आफ्नै

५ फागुन, काठमाडौं । प्रमुख प्रतिपक्षी दल नेपाली कांग्रेसले सार्वजनिक गरेको कार्यतालिकालाई मान्ने हो भने पर्सी फागुन ७ गते चौधौं महाधिवेशनको उद्घाटन हुनुपर्नेछ । तर आजसम्मको तयारी हेर्दा त्यस्तो सम्भावना देखिंदैन् । किनभने कुनै सुरसार गरिएकै छैन् । यति हुँदासमेत पार्टीका शीर्ष नेता आफ्नै धूनमा छन् । नयाँ मिति घोषणा गर्नुपर्छ भन्ने हेक्कासमेत नेताहरुलाई नभएको हो की केही जोखाना हेरेका हुन्, बुझ्न कठिन भएको छ ।

प्रधानमन्त्री केपी ओलीले हठात् प्रतिनिधिसभा विघटन गरेपछि विकसित राजनीतिक घटनाक्रमलाई कांग्रेस नेताहरुले स्वार्थकेन्द्रित भएर उपयोग गर्ने रणनीति बनाएका छन् । सभापति शेरबहादुर देउवा सकेसम्म चुनाव होस् र नेकपा फुटको फाइदा उठाउन पाइयोस् भन्ने ध्याउन्नमा देखिएका छन् । यस्तो अवस्थामा चुनावमा आफू अनुकूलका मानिसलाई टिकट दिएर जिताउन पाइने उनको दाउ छ ।

यसको प्रत्यक्ष फाइदा महाधिवेशनमा समेत हुने लख उनले काटेका छन् । चुनावपछि महाधिवेशन भयो भने त्यसले धेरै पक्षमा आफू बलशाली हुने ठम्याई देउवाको रहेको छ । उता, पार्टी संस्थापन इतर पक्षको दाउ अर्कै छ । देउवालाई आउने महाधिवेशनमा जसरी भएपनि हराउने एक सूत्रीय अभियानमा रहेको इतर पक्ष प्रतिनिधिसभा पुनस्थापना भए मात्रै सहज हुने ठम्याईमा रहेको छ ।

पुनस्थापनापछि देउवालाई संसदीय प्रकृयामा अल्झाएर महाधिवेशनमा आफ्नो पक्षको दवाव र प्रभाव बढाउने रणनीति यो पक्षको रहेको देखिन्छ । त्यसैको जुधाईमा परेको छ –महाधिवेशन । आज यही विषयमा छलफल गर्न पार्टी केन्द्रीय कार्यालयमा कार्यसमिति बैठक बस्दैछ । देउवा सकेसम्म सर्वाेच्च अदालतको निर्णय आएपछि मात्रै नयाँ मिति तोक्ने पक्षमा रहेको भएपनि असन्तुष्ट पक्षले यसलाई रणनीतिक रुपमा प्रयोग गर्ने बुझेपछि छलफल गराउन राजी भएका हुन् ।

देउवाले कार्यसमिति बैठक नै नराखी प्रेस विज्ञप्ति जारी गरेरै कार्यसमितिको म्याद आगामी भदौसम्म बढाउन लागेको भन्दै रामचन्द्र पौडेल पक्षले आजकै लागि जिल्ला सभापतिहरुको भेला बोलाएको थियो । तर देउवाले भेला बोलाएकै दिन कार्यसमिति बैठक डाकिदिएका छन् ।
केन्द्रीय कार्यसमिति बैठक बोलाइएकाले भेला स्थगित भएको छ । तर कार्यसमिति बैठक बस्नु अगाडि पौडेल पक्षले पार्टी कार्यालयमै निकट केन्द्रीय सदस्यहरुको बैठक गर्ने भएको छ । आज बिहान ११ बजेदेखि पौडेल पक्षीय नेताहरु छलफलमा जुटेका छन् । कार्यसमिति बैठक भने दिउँसो २ बजेका लागि डाकिएको छ ।

आजको बैठकले मूलतः दुईवटा अजेण्डामा छलफल गर्ने पार्टी प्रवक्तासमेत रहेका नेता विश्वप्रकाश शर्माले बताए । उनका अनुसार, आज महाधिवेशनको नयाँ मिति तोक्ने र सरकारविरुद्धको नयाँ चरणको आन्दोलनको स्वरुपबारे छलफल हुनेछ । कार्यसमितिको चार वर्षे कार्यकाल गएको फागुन २० गते नै समाप्त भएको थियो । तर सभापति देउवाले विधानमा भएको व्यवस्था बमोजिम एक वर्ष कार्यकाल थप्ने निर्णय गराएका हुन् । उक्त म्यादपनि यही फागुन १९ गते समाप्त हुँदैछ ।

आजको छलफलमा पौडेल पक्षले तत्कालै महाधिवेशन गर्न अग्रसर हुनुपर्ने भन्दै ०७८ जेठ अगावै सक्न दवाव दिने बुझिएको छ । तर देउवा भने वैशाखमा चुनाव हुने भएकाले जेठको सट्टा भदौमा गर्न प्रस्ताव गर्ने तयारीमा रहेको स्रोतले बतायो । असहज परिस्थितिमा ६ महिना कार्यकाल थप्न सकिने संवैधानिक व्यवस्था रहेको छ । सोही बमोजिम भदौसम्म थप्न देउवाको जोड रहने बुझिएको छ ।

दुबै पक्षले रणनीतिक रुपमा यो मामलालाई उपयोग गर्न खोजेकाले समस्या उल्झिएको हो । महाधिवेशन सम्पन्न गर्न आवश्यक धेरै काम अझै सुरु नै भएका छैनन् । क्रियाशील सदस्यतादेखि समायोजनका धेरै विषय अझै थाँती बसेका छन् । यस्तो अवस्थामा फास्ट ट्रयाकबाट काम गर्न पनि सजिलो छैन । त्यसैले कांग्रेसले चौधौं महाधिवेशन गर्न ठूलै बल र कसरत गर्नुपर्ने अवस्था छ ।