कांग्रेस नेतामाथि भएकाे आक्रमणको नेपाली जनसम्पर्क समिति अमेरिकाद्धारा घोर निन्दा

५ फागुन, काठमाडौं । संसद विघटनको असंवैधानिक र अलोकतान्त्रिक कदमका विरुद्धमा फागुन ४ गते बैतडी जिल्लाको डिलासैनीमा नेपाली कांग्रेसको शान्तिपुर्ण विरोध कार्यक्रम भइरहेको वेलामा प्रधानमन्त्री केपी ओली निकट नेकपाबाट नियोजित रूपमा गरिएको सांघातिक आक्रमणको नेपाली जनसम्पर्क समिति अमेरिकाले घोर निन्दा र भत्सर्ना गरेको छ ।

यो घटनाले संविधानले प्रदत्त गरेको शान्तिपुर्ण नारा जुलुस, विरोध प्रदर्शन गर्न पाउॅने नागरिकको नैसर्गिक अधिकार माथि सत्तारूढ नेकपाको स्थानीय पार्टी पंक्तिले ठाडो र निर्मम प्रहार गरेको समितिका  महासचिव मुनिन्द्र नेम्बाङले विज्ञप्तिमार्फत जनाएका छन् ।

नागरिकको अभिव्यक्ति स्वतन्त्रताको हकलाई खोसेर लोकतन्त्रलाई नै मटियामेट पार्न खोज्ने सर्वसत्तावादी सत्तारूढ नेकपाको यस्ता उग्रवादी चरित्र र कदम निन्दनीय भएको हाम्रो ठहर छ, विज्ञप्तिमा उल्लेख गरिएको छ ।

त्यसैले संविधान र कानुनको धज्जी उडाउॅदै, शान्तिपुर्ण भइरहेको कार्यक्रमलाई जताभावी आक्रमण गरी बिथोल्न खोज्ने दोषीलाई अबिलम्ब पक्राउ गरी कार्वाही गर्न नेपाली जनसम्पर्क समिति अमेरिका सरकारसँग जोडदार माग गरेको छ ।

आक्रमणबाट नेपाली कांग्रेसका केन्द्रीय सदस्य नेता एनपी साउद, युवा नेता शैलेश बिष्ट, नेविसंघका पूर्व केन्द्रीय सदस्य सुमन केसी र नेविसंघका नेता मदनराज उपाध्याय घाइते भएकोप्रति समितिले दुख व्यक्त गरेको छ ।

शान्तिपुर्ण भैरहेको कार्यक्रममा एक्कासी र अराजक ढंगले गरेको सांघातिक आक्रमणलाई निडर र साहसका साथ प्रतिपाद गर्नुहुने घाइते नेतागण लगायत नेकाका केन्द्रीय सदस्य डिला संग्रौला, नेका बैतडीका सभापति नरेन्द्रजंग थापा, नेविसंघका पूर्व सभापति नैनसिंह महरका साथै स्थानीय नेता एवं कार्यकर्ता र तरूण साथीहरूप्रति समितिले सम्मान प्रकट गरेको हो ।

यस्ता उग्रवादी चरित्र निरंकुश प्रवृत्ति, कार्यशैली र ब्यवहारको सर्वत्र विरोध गर्दै, संविधान र लोकतन्त्रको रक्षार्थ लोकतान्त्रिक शक्ति र विश्वभर छरिएर रहेका आम लोकतन्त्रवादी नेपालीलाई एकजुट भएर आवाज बुलन्द पार्न समिति सबैमा बिनम्र आग्रह गरेको नेपाली जनसम्पर्क अधिवेशन, तयारी समिति अमेरिकाका महासचिव मुनिन्द्र नेम्बाङले जनाएका छन् ।