कांग्रेसका नेता जोशीको नशा फुटेर मस्तिष्कमा छरिएको रगत निकालियाे

१४ फागुन, काठमाडौं । पूर्वउद्योगमन्त्री तथा नेपाली कांग्रेसका नेता नवीन्द्रराज जोशीको मस्तिष्कमा नसा फुटेर छरिएको रगत ड्रेन गरेर निकालिएको छ । स्वास्थ्य उपचारमा खटिएका एक चिकित्सकका अनुसार जोशीको मस्तिष्कको नशा फुटेर मस्तिष्कमा छरिएको रगतलाई ड्रेन गरेर मस्तिष्कबाट रगत निकालिएको हाे।

शुक्रबार बिहान ३ बजेतिर शरीरको देब्रे भाग नचल्ने समस्या देखिर्एपछि सुरुमा उपचारका लागि जोशीलाई वीर अस्पताल पुर्‍याइएको थियो।तर, त्यहाँ उपचार हुन नसकेपछि तत्काल थापाथलीस्थित नर्भिक अस्पताल ल्याइएको थियो । शल्यक्रिया सफल भए पनि उनको स्वास्थ्य अवस्था भने जटिल रहेको ती चिकित्सकले बताएका छन्।

नर्भिकमा डाक्टर राजीव झा नेतृत्वको चिकित्सक टोलीले जोशीको स्वास्थ्य उपचार गरिरहेका छन्। केस क्रिटिकल रहेकाले ४८ घन्टासम्म स्वास्थ्यको रेखदेख गर्नुपर्ने बताइएको छ ।