नेता जोशीको स्वास्थ्य अवस्था सुधार

१६ फागुन, काठमाडौं । नेपाली कंग्रेसका नेता तथा पूर्वमन्त्री नवीन्द्रराज जोशीको स्वास्थ्य अवस्थामा क्रमिक सुधार हुन थालेको छ । शुक्रबार बिहान मष्तिष्कघात भई नर्भिक अस्पतालमा उपचाररत नेता जोशीको स्वास्थ्य सुधार भइरहेको छ ।

उनको आइसियूको भेन्टिलेटरमा राखेर उपचार भइरहेको छ । शनिवारको तुलनामा उनको स्वास्थ्य अवस्था आइतबारसम्ममा निकै सुधार देखिएको उपचारमा संलग्न न्यूरो सर्जन डा. राजीव झाले जानकारी दिए ।

झाका अनुसार शनिवारभन्दा आइतबार नेता जोशीले दाहिने हात र खुट्टा बढी चलाउनुभएको छ । जोशीलाई आइतबार बिहानदेखि नै बेहोस् पार्ने औषधि दिन छाडिएको छ झाले जानकारी दिए ।

यस्तै, आइतबार जोशीको सिटी स्क्यान पनि गरिएको छ । जसअनुसार उनको टाउकोमा जमेको रगत र रक्त मिश्रित पानी समेत लगभग सफा भएको जनाइएको छ । ‘उहाँको अवस्था अझै खतरामुक्त भने छैन ।’ डा. झाले भने, ‘उहाँको अहिलेको अवस्थालाई जटिल, तर सुधारोन्मुख भन्नुपर्छ ।’