एभरेष्ट प्रिमियर लिगको मिति सार्वजनिक

१७ फागुन, काठमाडौं । चौंथो संस्करणको एभरेष्ट प्रिमियर लिग (ईपीएल) क्रिकेटको मिती सार्वजनिक गरिएको छ।

आयोजक ईपीएल क्रिकेटले आइतबार चौंथो संस्करणको प्रतियोगिता असोज ९ गतेबाट असोज २३ गतेसम्म हुने जनाएको छ। ईपीएलको यस मितिलाई नेपाल क्रिकेट संघ (क्यान) ले समेत स्वीकृति दिएको छ।

क्यानले प्रतियोगिता आयोजनाको लागि अनुमति दिएको ईपीएलका एमडी आमिर अख्तरले जानकारी दिए। प्रतियोगिताबारे बाँकी पछि विस्तारै जानकारी गराइने उनले बताए।

गत चैत्र १ देखि १५ गतेसम्म हुने भनिएको प्रतियोगिता कोरोनाका कारण स्थगित भएको थियो। यसअघि ईपीएल खेल्नका लागि वेष्ट इण्डिजका क्रिस गेलसँगै विश्वका १६ स्टार क्रिकेटर नेपालमा खेल्न आउने पक्का भइसकेको थियो।

अख्तरले आगामी सिजनमा समेत पहिले अनुबन्धित खेलाडीले खेल्ने बताए। प्रतियोगितामा ६ शहरका फ्रेन्चाइज टिमले सहभागिता जनाउने छन्। साविक विजेता ललितपुर, पोखरा राइनोज, चितवन टाइगर्स, काठमाडौं किंग्स इलावेन, भैरहवा ग्ल्याडियटर्स र विराटनगर वारिवर्स छन्।