ब्राजिलमा पछिल्लो २४ घण्टामा कोरोना बाट एक हजारको मृत्यु

१९ फागुन, एजेन्सी । ब्राजिलमा पछिल्लो २४ घण्टामा कोरोना भाइरस ‘कोभिड–१९’ बाट एक हजार ६४१ जनाको मृत्यु भएको छ । ब्राजिलको स्वास्थ्य मन्त्रालयका अनुसार मंगलबार ब्राजिलमा कोरोनाबाट सबैभन्दा धेरै मानिसको मृत्यु भएको हो । यसअघि सन् २०२० को जुलाइमा एकैदिन एक हजार ५९५ जनाको मृत्यु भएको थियो ।

त्यसयता विस्तारै कोरोना संक्रमणमा कमी आए पनि पछिल्लो समय कोरोनाको नयाँ प्रकार ‘भेरियन्ट’ देखिएसँगै यसबाट मृत्यु हुनेको संख्या पनि बढेको हो । अहिलेसम्म ब्राजिलमा कोरोनाबाट दुई लाख ५७ हजारभन्दा धेरैको मृत्यु भइसकेको छ । कोरोना संक्रमण बढेसँगै ब्राजिलको अस्पतालको प्रणालीमाथि पनि दबाब बढेको छ ।

अहिले ब्राजिलका विभिन्न राज्यका गभर्नरहरु आफैं कोरोना खोप खरिदको लागि अग्रसर भएका छन् । केन्द्रीय सरकारले खोप खरिदको प्रक्रिया निकै सुस्त अघि बढाइरहेको भन्दै उनीहरु आफैंले खोप कार्यक्रम अघि बढाउने निर्णय गरेका हुन् ।

गत साता ब्राजिलका राष्ट्रपति जेयर बोल्सोनारोले मास्क लगाउने नियमको आलोचना गर्दै यसको कारण टाउको दुख्ने र राम्रोसँग खुसी व्यक्त गर्न नसकिने बताएका थिए । उनले निरन्तर कोरोनालाई बेवास्ता गर्दै आएका छन् । सुरुवातमा पनि उनले कोरोना भाइरसको कारण अर्थतन्त्रलाई रोक्न नहुने बताएका थिए ।