पाकिस्तानी शहर र काठमाडौंबीच सिधा उडान गर्नुपर्नेमा जोड

२० फागुन, काठमाडौं । पाकिस्तानका लागि नेपाली राजदूत तापस अधिकारीले नेपाल र पाकिस्तानको बीचमा व्यापार र आर्थिक सहकार्यको ठूलो सम्भावना रहेकाले त्यसलाई प्रवर्द्धन गर्नका लागि सीधा हवाई उडान सञ्चालन गर्नुपर्ने बताएका छन् ।

बुधबार पाकिस्तानी व्यसायीहरुसँगको भेटघाटमा राजदूत अधिकारीले पाकिस्तान इन्टरनेसनल एयरलाइन्स ‘पीआइए’ ले पाकिस्तानी शहर र काठमाडौंबीच सिधा उडान गर्नुपर्ने बताए ।

उनले नेपाल र पाकिस्तानले पर्यटन लगायतका क्षेत्रमा सहकार्य अघि बढाउन पर्नेमा पनि जोड दिए । राजदूत अधिकारीले पाकिस्तानी व्यवसायिक समुदायलाई नेपाल भ्रमण गर्न आग्रह गर्दै व्यपारका माध्यमबाट दुई मुलुक थप नजिकिने सक्ने पनि बताए ।

उता इस्लामावाद च्याम्बर अफ कमर्स एण्ड इन्डस्ट्री ‘आइसीसीआई’ का अध्यक्ष सरदार यासिर इलियासले दुई मुलुकबीच एकदमै कम व्यापार भइरहेकाले निजी क्षेत्रले विशेष पहल गरी आर्थिक सहकार्यलाई बलियो बनाउनु पर्नेमा जोड दिए ।

इलियासले नेपालतर्फ कलकारखानाका पाटपुर्जा, औषधि, लत्ता कपडा, छालाका वस्तु, फलफुल लगायतका पाकिस्तान उत्पादन पठाउन सकिने बताए । कृषी, उर्जा, प्रविधि लगायतका क्षेत्रमा दुई मुलुकले सहकार्य गर्नुपर्नेमा पनि जोड दिए ।