विप्लव राजधानी आएलगत्तै तीब्र भेटघाट

२१ फागुन, काठमाडौं । नेपाल कम्युनिष्ट पार्टी माओवादी क्रान्तिकारीका महासचिब नेत्रविक्रम चन्द ‘विप्लब’ राजधानी आएलगत्तै राजनीतिक क्रियाकलापमा सक्रिय हुन थालेका छन् । आज नेपाल सरकार र आफ्नो पार्टीबीच भएको सहमतिपत्रमा हस्ताक्षर गर्ने कार्यक्रम रहेकाले राजधानी आएका हुन् ।

हिजो मात्रै सरकारी वार्ता टोलीसँग सहमति जुटेपछि विप्लव मूलधारको राजनीति गर्न राजी भएका छन् । आज बिहान उनी नवलपरासीका सार्वजनिक भए । लगत्तै उनी राजधानीतर्फ लागे । यतिबेला विप्लब सामाखुसीस्थित आफन्तको घरमा छन् । त्यहाँ उनले पार्टीका नेताहरुसँग छलफल गरेका छन् ।

सरकारसँग भएको सहमति बमोजिम थुनामा रहेका नेता कार्यकर्ताहरु आजैबाट छुट्न थालेका छन् । यसैक्रममा बिहान काभ्रेको धुलिखेलबाट सचिबालय सदस्यसमेत रहेका नेता धर्मेन्द्र बाँस्तोला थुनामुक्त भएका छन् । उनी छुटे लगत्तै महासचिब विप्लबलाई भेट्न सामाखुसी पुगे ।

सबैजना भेला भई अब राष्ट्रियसभामा आयोजना हुने विशेष कार्यक्रममा सहभागी हुने भएका छन् । उक्त कार्यक्रममा प्रधानमन्त्री केपी ओली र विप्लबले विशेष सम्बोधन गर्ने तय भएकोछ ।