सन्दीपले पाए काठमाडौं मेयर टिमको कप्तानी

२१ फागुन, काठमाडौं । राष्ट्रिय टिमका लेगस्पिनर सन्दीप लामिछानेले शनिबारदेखि काठमाडौंमा सुरु हुन लागेको मेयर कप एकदिवसीय क्रिकेट प्रतियोगिता खेल्ने भएका छन् ।

उनले काठमाडौं मेयर-११ टिमबाट प्रतियोगिता खेल्ने भएका हुन् । काठमाडौं मेयर-११ ले पहिलो खेल आइतबार बागमती प्रदेशविरुद्ध खेल्ने छ ।

पाकिस्तान सुपर लिग (पीएसएल) स्थगित भएपछि सन्दीपले मेयर कप खेल्ने भएका नेपाल क्रिकेट संघ (क्यान)ले जनाएको छ ।

क्यानका अनुसार सन्दीपले मेयर-११ को कप्तानी पनि गर्नेछन् । उनी पीएसएलका लागि गत शनिबार पाकिस्तान प्रस्थान गरेका थिए ।

केही खेलाडीलाई कोरोना संक्रमण देखिएपछि पीएसएल अनिश्चितकालका लागि स्थगित गरिएको छ ।

सन्दीप राशिद खानको स्थानमा पीएसएलमा जोडिएका थिए । उनी एक म्याच पनि नखेल्दै शुक्रबार नेपाल पुग्दैछन् ।

भोलिदेखि सुरु हुने प्रतियोगितामा त्रिभुवन आर्मी क्लब, नेपाल पुलिस क्लब, सशस्त्र प्रहरीको एपीएफ क्लब, वागमती प्रदेश र काठमाडौं मेयर-११ क्लबले प्रतियोगिता खेल्ने छन् ।

प्रतियोगिताको विजेताले ५ लाख र उपविजेताले ३ लाख रुपैयाँ हात पार्नेछ ।

काठमाडौं मेयर-११ को टिम – सन्दीप रजाली, खड्गबहादुर बोहरा, हरिशंकर शाह, सौरभ खनाल, विवेक यादव, कृष्ण कार्की, रविन्द्र जंग शाही, बिपिन रावल, बिपिन खत्री, सन्दीप लामिछाने ९कप्तान०, सिद्धान्त लोहनी, अर्जुन कुमाल, अनिल खरेल, विक्रम भुसाल, नारायण जोशी र अनुज चुनारा ।