फैसलाउपर पुनरावलोकनको तयारी

२३ फागुन, काठमाडौं । सर्वाेच्च अदालतले नेकपा नामको पार्टी ऋषि कट्टेललाई जिम्मा लगाएपछि विखलबन्दमा परेका प्रचण्ड–माधव पक्षले फैसलाविरुद्ध पुनरावलोकनमा जाने तयारी थालेको छ । यस प्रयोजनका लागि नेताहरु पुष्पकमल दाहाल ‘प्रचण्ड’ र माधवकुमार नेपाललगायतले कानूनी परामर्श थालेका छन् ।

फैसला लगत्तै अनपेक्षित भन्ने टिप्पणी गरेका प्रचण्ड, नेपाललगायत नेताहरु अहिले वरिष्ठ अधिवक्ताहरुसँग परामर्श थालेका छन् । सिंहदरबारस्थित संसदीय कार्यालयमा भइरहेको परामर्शमा वरिष्ठ अधिवक्ताहरु रमनकुमार श्रेष्ठ, टीकाराम भट्टराई, शतीशकृष्ण खरेललगायत रहेका छन् ।

फैसलामा धेरै पक्ष त्रुटिपूर्ण रहेको भन्दै कानून व्यवसायीहरुले सर्वाेच्चमै पुनरावलोकनका लागि जान सकिने धारणा राखेका छन् । अधिवक्ता भट्टराईले दिएको तर्क अनुसार, रिट निवेदकको माग दाबी भन्दा बाहिर गएर अदालतले आदेश गरेको छ ।

निवेदक ऋषि कट्टेलले नेकपा पार्टी आफ्नो रहेको मात्र माग गरेकोमा अदालतले क्षेत्राधिकार बाहिर गई नेकपा एमाले र माओवादी ब्यूँताउने आदेश गरेको छ, त्यो आफैंमा बदरभागी छ ।