सोमपालले हिर्काए ३७ बलमै अर्धशतक, महंगा रहे सन्दीप

२४ फागुन, काठमाडौं । काठमाडौंमा जारी मेयर कप एकदिवसीय क्रिकेट प्रतियोगिताअन्तर्गत त्रिभुवन आर्मी क्लबका अलराउन्डर सोमपाल कार्मीले आक्रामक अर्धशतक बनाएका छन् ।

उनले काठमाडौं मेयर्स–११ टिमविरुद्ध ३८ बलमा तीन छक्का र सात चौकासहित अर्धशतक बनाएका हुन् ।

जारी प्रतियोगितामा सोमपालको यो पहिलो अर्धशतक हो ।

पहिलो खेलमा बागमती प्रदेशविरुद्ध उत्कृष्ट प्रदर्शन गरेका मेयर्स–११ टिमका कप्तान सन्दीप लामिछानेले भने आज खराब बलिङ गरेका छन् ।

सन्दीपले ५ ओभरमा बिनाविकेट ४३ रन खर्चिसकेका छन् । जसक्रममा उनले तीन छक्का र दुई चौका दिइसकेका छन् ।

कीर्तिपुरस्थित त्रिवि क्रिकेट मैदानमा टस हारेर ब्याटिङको मौका पाएको मेयर्स–११ ले ४२.१ ओभरमा सबै विकेट गुमाएर १ सय ५५ रन बनायो ।

उसका लागि सौरभ खनालले ७३ बलमा दुई चौका र दुई छक्कासहित सर्वाधिक ४७ रन बनाए ।

त्यस्तै, सन्दीप रजालीले ३७, खडक बोहराले १९, हरिशंकर साहले १८ रनको योगदान दिए ।

कप्तान सन्दीप लामिछाने आज १३ रनमै आउट भए । उनले आज १८ बलको सामना गर्दा २ चौकाको मद्दतमा १३ रन मात्र जोड्न सके ।

पहिलो खेलमा आइतबार बागमती प्रदेशविरुद्ध सन्दीपले २० बलका ६ छक्काको मद्दतमा ४२ रनको पारी खेलेका थिए ।

बलिङमा आज साहब आलमले चार, जितेन्द्र मुखियाले तीन, सोमपाल कामी, बिक्रम सोब र कुशल मल्लले एकरएक विकेट लिए ।