राष्ट्रपतिलाई साक्षी राखेर ओलीले भने: मध्यावधि निर्वाचनको विकल्प छैन

३ चैत, काठमाडौं । प्रधानमन्त्री केपी ओलीले नयाँ जनादेशमा जानुको विकल्प नभएको बताएका छन् । राष्ट्रपतिलाई साक्षी राखेर प्रधानमन्त्री ओलीले पुन मध्यावधि निर्वाचनमा जानुपर्ने भनाई दोहो¥याएका हुन । ओलीको उक्त भनाईमा राष्ट्रपति बिद्यादेवी भण्डारीले घुमाउरो ढंगले सहमति जनाएको सहभागी एक नेताले दावी गरे ।

प्रधानमन्त्री ओलीका हरेक निर्णयमा आँखा चिम्लेर साथ दिदै आएकी राष्ट्रपति भण्डारीले ओलीकै बचाउका लागि आजको सर्वदलीय वैठक आयोजना गरेको आरोप लाग्दै आएको छ । राष्ट्रपति विद्यादेवी भण्डारीले मंगलबार साँझ शीतलनिवासमा आयोजना गरेको सर्वदलीय बैठकमा प्रधानमन्त्री ओलीले संसद विघटन गर्ने आफ्नो यसअघिकाे निर्णय गलत नभएको समेत जिकिर गरे।

सो सर्वदलीय वैठकमा सहभागी नेपाली कांग्रेसका वरिष्ठ नेता रामचन्द्र पौडेलले राष्ट्रपति भण्डारी र प्रधानमन्त्री ओलीले फेरि ठूलै षडयन्त्रको तयारी थालेको हो कि भन्ने आफुलाई लागेको नेपालबहसलाई बताएका छन् । संसद बिघटन पूर्व गर्नुपर्ने राष्ट्रपतिले यस्ता संवाद थाल्नु पर्नेमा अहिले बेमौसमी बाजाको रुपमा सर्वदलीय वैठक बोलाएको बताउँदै वरिष्ठ नेता पौडेलले देशलाई पुन अनिश्चय र अस्थिरतातर्फ धकेल्ने प्रयासको यो पछिल्लो कडी भएको बताए । देशलाई संकटतर्फ धकेलेर बर्वादीको बाटोमा लाने प्रपञ्च मात्र भएको पौडेलको टिप्पणी थियो ।

प्रधानमन्त्री ओलीले संसद विघटन गर्ने आफ्नो कदमको बचाऊ गर्दै संसद विघटन गरेर ताजा जनादेशमा जानुपर्ने भनाइ राखेको राष्ट्रिय जनमोर्चाका अध्यक्ष चित्रबहादुर केसीले बताए ।

यस्तै बैठकमा राष्ट्रपति विद्यादेवी भण्डारीले संविधानको प्रभावकारी कार्यान्वयन र लोकतन्त्रको सुदृढिकरणका लागि राजनीतिक दलबीचको सहकार्यलाई निरन्तरता दिनुपर्ने बताएकी छन् । मंगलबार राष्ट्रपति कार्यालय शीतलनिवासमा आयोजित सर्वदलीय बैठकमा उनले आपसी संवाद, सहकार्य र एकता नेपालको राजनीतिक सौन्दर्य भएको पनि उल्लेख गरिन् ।