खनाल–नेपाल भेलाको निश्कर्ष : ओली प्रवृत्ति घातक

५ चैत, काठमाडौं । नेकपा एमालेको झलनाथ – माधव समूहको राष्ट्रिय कार्यकर्ता भेलाले मुलुकको कम्युनिष्ट आन्दोनललाई बलियो बनाउन केपी ओली नेतृत्वको सरकार तत्कालै विस्थापित गर्नपर्ने निश्कर्ष निकालेको छ । हिजो र आज ललितपुरमा भएको भेलाले कम्युनिष्ट आन्दोलन कमजोर बनाउन ओली प्रवृत्ति कारक रहेको भन्दै तत्कालै नेकपा माओवादी केन्द्रसँग कार्यगत एकता थाल्नुपर्ने निचोड निकालेको छ ।

विभिन्न समूह बनाएर गरिएको छलफलको प्रतिवेदनहरु लगभग उस्तै समस्या र समाधानको उपाय सुझाउने खालका देखिएका छन् । अहिले सबै प्रतिवेदन मिलाएर एउटै दस्ताबेजका रुपमा निकाल्ने तयारी भइरहेको छ । ओली प्रवृत्तिले कम्युनिष्ट आन्दोलन कमजोर र बद्नाम भएको भन्दै अब सबै वामपन्थी शक्तिलाई समेटेर अगाडि बढ्नुको विकल्प नरहेको सबैको धारणा पाइएको छ ।

विगतमा नेकपा र अहिले एमालेलाई कमजोर बनाउन ओलीले राज्य संयन्त्रको भरपूर दुरुपयोग गरेको भन्दै यसलाई नियन्त्रण गर्नकै लागि भएपनि ओली सरकार विस्थापित गर्नै पर्ने उल्लेख भएको छ । पार्टी अध्यक्ष जस्तो मानिस गुटबन्दीमा रमाउन थालेकाले पार्टीलाई ठूलो क्षति पुगेको भन्दै अधिकांश कार्यकर्ताहरुले ओलीलाई सच्याउन जोडदार कार्यक्रम ल्याइनुपर्नेमा जोड दिएका छन् ।

पार्टी संरचनालाई अझ बलियो र सुदृढ बनाउन कार्यकर्ता तहमा मनोबल बढाउनुको सट्टा कमजोर बनाउन थालिएको भन्दै अब जस्तो सुकै अवस्थामा पनि ओली प्रवृत्तिलाई परास्त गर्नु आवश्यक रहेको उल्लेख गरिएकोछ । साँझ एकीकृत दस्ताबेज घोषणा गर्ने कार्यक्रम तय भएको स्रोतले बताएको छ ।