बादलहरु पदमुक्त हुँदै

८ चैत, काठमाडौं । नेकपा माओवादी केन्द्रले पार्टी त्यागेर एमाले प्रवेश गरेका सांसदहरूकाे पद रिक्त गर्न निर्वाचन आयोगलाई पत्राचार गर्ने भएको छ । नेकपा विघटन भई एमाले र माओवादी केन्द्रमा विभक्त पार्टी व्यूँतिएपछि आफ्नै समूहमा लाग्दासमेत रामबहादुर थापालगायत पूर्व माओवादी नेताहरु नफर्किएपछि यस्तो पत्राचार गर्न लागिएको हो ।

सम्भवतः भोलि नै केन्द्रीय कमिटी बैठक बसेर एमालेमा लाग्नेहरुलाई कारबाही गरिने बताइएको छ । माओवादी पक्षबाट सांसद भएकाहरुमा थापाका साथै, टोपबहादुर रायमाझी, प्रभु साह र लेखराज भट्ट केपी ओली नेतृत्वको वर्तमान सरकारमा मन्त्री रहेका छन् ।

उनीहरुलाई गएको साता नै पार्टीले स्पष्टीकरण सोधिसकेको छ । तर कसैले पनि जवाफ दिएनन् । त्यसैले अब भने उनीहरुको पद रिक्त गर्ने गरी प्रकृया अघि बढाइने छ– खुमलटार स्रोतले भन्यो । यी लगायत प्रदेश सभाका कतिपय सांसद्समेत एमालेमा गएका छन्, उनीहरुलाई पनि कारबाही गरिने जानकारी स्रोतले दिएको छ ।