आपसी विवादमा मट्टितेल छर्किदा आगलागी, प्रेमी–प्रेमिका घाइते

१० चैत, काठमाडौं । काठमाडौं उपत्यकाको गोठाटारमा आपसी झगडामा आगो लगाउदा प्रेमी–प्रेमिका घाइते भएका छन् ।
प्रहरीका अनुसार आपसी झगडाका क्रममा आगलागी हुँदा दुई जना घाइते भएका हुन् । घाइते हुनेमा प्रेमी–प्रेमिका भएको प्रहरीले जनाएको छ ।

प्रहरीका अनुसार काठमाडौंको गोठाटारमा कोठा गरी बस्ने सोलुखुम्बुकी १८ वर्षीया युवतीको कोठामा सो घटना भएको हो । जोरपाटी घर भएका सुरज श्रेष्ठ युवतीको कोठामा पुगेका थिए भने उनीहरु प्रेमीप्रेमिका भएको प्रहरीको प्रारम्भिक अनुसन्धानबाट खुलेको छ ।

प्रहरीका अनुसार युवतीको कोठामा आपसी विवादका क्रममा युवकले मट्टितेल छर्किएर युवतीलाई पनि मार्ने र आफूपनि मार्ने भन्दै आगो लगाएको प्रारम्भिक अनुसन्धानबाट खुलेको छ । आगलागीबाट युवतीको अनुहारलगायत माथिल्लो भाग जलेर छ । उनको अवस्था अहिले गम्भीर रहेको र उनको कीर्तिपुरस्थित फेक्ट अस्पतालमा उपचार भइरहेको प्रहरीले जनाएको छ ।

यस्तै युवकको पेटको भाग सामान्य जलेको र जोरपाटीस्थित शुष्मा कोइराला अस्पतालमा उपचार भइरहेको छ । आगलागीबाट कोठामा केही कपडा जलेपनि अन्य क्षति भने नभएको बताउँदै प्रहरीले यसबारे थप अनुसन्धान भइरहेको जनाएको छ ।