बालुवाटारमा प्रधानमन्त्री र सभामुखबीच भेटवार्ता

१५ चैत, काठमाडौं । आइतबार बालुवाटारमा प्रधानमन्त्री केपी ओली र सभामुख अग्निप्रसाद सापकोटाबीच भेटवार्ता भएको छ। आज सापकोटा प्रधानमन्त्रीलाई भेट्न बालुवाटार पुगेका थिए । प्रतिनिधिसभा पुनर्स्थापित भए पनि संसदले बिजनेस नपाएको भन्दै आलोचना भइरहेका बेला प्रधानमन्त्री र सभामुखबीच भेट भएको हो।

संसदलाई प्रभावकारी बनाउने र सार्वजनिक महत्वका विधेयकलाई अगाडि बढाउने विषयमा ओली र सापकोटाबीच करिव दुई घन्टा कुराकानी भएको बताइएको छ ।

सरकारले बिजनेश नदिँदा प्रतिनिधिसभा बैठक प्रभावकारी हुन नसकेको गुनासो भइरहेका सभामुखले केही दिन अगाडि प्रधानमन्त्री ओलीसँग भेटका लागि समय माग गरेका थिए ।

पुष ५ मा प्रधानमन्त्री ओलीले प्रतिनिधिसभा विघटन गरे पनि सर्वोच्च अदालतले बदर गरिदिएपछि प्रतिनिधिसभा पुनर्स्थापना भई बैठक चलेको छ।