नेपाल पक्ष आन्तरिक छलफलमा

१७ चैत, काठमाडौं । नेकपा एमालेका अध्यक्ष केपी शर्मा ओलीले वरिष्ठ नेता माधव कुमार नेपाल र उपाध्यक्ष भीम रावललाई निलम्वन गरेपछि नेपाल पक्षका नेताहरु आन्तरिक छलफलमा जुट्दैछन् ।

उनीहरु मध्याह्न १२ बजेपछि छलफलमा जुट्न लागेका हुन् । नेपाल पक्ष पछिल्लो परिस्थितिमा कसरी अगाडि बढ्ने भनेर छलफल गर्न लागिएको हो ।

अनुशासन विपरीत गतिविधि गरेको भन्दै एमाले अध्यक्ष केपी ओलीले सोमबार वरिष्ठ नेता नेपाल र नेता रावललाई ६ महिनाको लागि पार्टीबाट निलम्बन गरेका थिए ।

यसैबीच नेकपा एमालेका वरिष्ठ नेता नेपालले आफूलाई निलम्बन गर्ने अधिकार अध्यक्ष केपी शर्मा ओलीलाई नभएको स्पष्ट पारेका छन्। नेता नेपालले केन्द्रीय कमिटीनै विघटन गरेका व्यक्तिले कारबाही गरेँ भनेर हल्ला फैलाउनु कुनै अर्थ नरहने बताए।

सर्वोच्चको आदेशले सत्तारुढ दल नेकपाको एकता नै खारेज गर्दै नेकपा एमाले र नेकपा माओवादी ब्यूँत्याइदिएपछि प्रतिक्रियामा पूर्वप्रधानमन्त्री समेत रहेका नेपालले एमाले पार्टी निर्माणमा सबैभन्दा बढी योगदान आफ्नो रहेको बताएका छन् ।