सकियाे सरकार र थरुहट संघर्ष समितिको पहिलो वार्ता !

१७ चैत, काठमाडौं । सरकारले थारु कल्याणकारी सभा, थारुहटर थारुवान संयुक्त संघर्ष समिति केन्द्रीय आन्दोलन परिचालन समितिको वार्ताटोली सँग आज पहिलो चरणको वार्ता गरेको छ ।

टीकापुर हत्याकाण्डका प्रमुख दोषी ठह¥याई अदालतबाट कसुरदार घोषित रेशम चौधरीलाई रिहा गर्न सरकारी टोलीको सक्रियता तीब्र भएपछि आज दुबै पक्षले आ आफ्ना कुरा राखेका छन् ।

थप छलफलका लागि बिहीबार पर्सि पुन: बस्नेगरी आजको वार्ता टुंगिएको छ । लामो समयदेखि आन्दोलनमा रहेका थारुहरुसँग प्याकेजमै सहमति गर्ने हेतुले सरकारले वार्ता प्रकृया अगाडि बढाएको हो ।

वार्तामा सरकारका तर्फबाट गृहमन्त्री थापा, सदस्यहरु डा। राजन भट्टराई र पूर्व सांसद् भगवति चौधरी रहेका छन् । यस्तै आन्दोलनकारीका तर्फबाट रुक्मणि चौधरीको संयोजकत्वमा प्रेमलाल चौधरी ,पदमलाल चौधरी,प्रभात चौधरीलगायत छन् । यस्तै थारु कल्याणकारिणी सभाका संयोजक धनिराम चौधरीलगायत नेताहरु सहभागी रहेका छन् ।

२०७२ भदौमा टीकापुर घटनामा थारु कल्याणकारी सभाका अध्यक्ष धनिराम चौधरी, सांसद रेशम चौधरी लगायतमाथि लगाइएको मुद्दा फिर्ता गरिनुपर्ने, थरुहट आन्दोलनको क्रममा मारिएकाहरुलाई शहीद घोषणा गर्नुपर्ने, लोकसेवा आयोगलगायत राज्यका विभिन्न निकायमा थारु समुदायका लागि छुट्टै आरक्षणको व्यवस्था गर्नुपर्ने सहितका १९ बुँदे माग राखेर केही दिनदेखि उनीहरु आन्दोलनमा छन् ।